Ипотекийн найман хувийн зээлийг зургаан хувь руу буулгах санал авч эхэлжээ. Энэ сарын 17-оос иргэдийн гарын үсгийг цуглуулж эхэлсэн бөгөөд 30 хоногийн дотор  100 мянган хүн дэмжвэл УИХ-аар батлуулах юм байна.

Бага дунд орлоготой иргэдийг дэмжих зорилготой ипотекийн зээлийн жилийн 6 хувь байхаар 2020 оны аравдугаар сарын 1-ны өдрөөс тогтоосон. Үүнтэй холбогдуулан иргэдийн олонх нь  8  хувийн зээлийн хүүгээ 6 болгох хүсэлтээ гаргасан тул дээрх саналыг авч эхэлжээ. Мөн Шадар сайд С.Амарсайхан  ипотекийн зээлийн хүүг бууруулах боломжтой гэх хариуг өгсөн тул ийнхүү УИХ-аар хэлэлцүүлэн батлуулахаар иргэдээс гарын үсэг цуглуулж эхэлжээ. Үүний талаар дэлгэрэнгүй мэдээллийг https://petition.parliament.mn/Detail?id=5a213a9c-3aeb-4cee-b81f-f7288f136b8c&fbclid=IwAR0tiHouHVILvscAbLnWpeb7CPIxUvyCYnAmoG-DMbLpXdoqId09ZVeV7Pk  аваарай. 

2013 оноос хойш хэрэгжүүлсэн ипотекийн 8 хувийн хүүтэй зээлийг олгож эхэлснээс хойш нийт 100 мянган өрх  5 их наяд төгрөгийн зээл авчээ. Энэ зээлийг авсан иргэд сар бүр өрхийн орлогынхоо 45 хүртэлх хувь буюу дунджаар 700 гаруй мянган төгрөгийг 30 жилийн турш төлж байгаа юм. Хэрэв Шадар сайдын үг биелэлээ олбол  100 мянган өрхийн ачаа хөнгөрнө гэсэн үг. Шадар сайдын зүгээс өмнө ипотекийн зээлийн 8 хувийг 6 хувиас бага хүүтэй олгох боломжтой гэдгийг мэдэгдэж байсан билээ. Харин Монголбанкны зүгээс ипотекийн зээлийн жилийн 6 хувийн хүү бусад улс орнуудтай харьцуулахад хамаагүй бага тул үүнээс илүү бууруулах боломжгүй гэдэг байр суурьтай байгаа юм.