УИХ-ын чуулганы хуралдаанаар Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэх эсэхийг хэлэлцэж байна. 

Энэ үеэр УИХ-ын гишүүн Д.Ганбат УИХ-ын даргын санаачилсан НӨАТ-ын буцаан олголтыг таван хувьд хүргэх санаачилгыг дэмжиж байгаагаа илэрхийлж, төсөвт тусгах боломжтой талаар үг хэлэв. Харин Сангийн сайд Б.Жавхлан "НӨАТ бол тойргийн асуудал биш. Улс орны албан татвар, тогтолцооны асуудал. Тооцоо судалгаа хийх ёстой. Тооцоо судалгаа байвал ярилцъя. Төсөв өргөн барьсны дараа гэнэт гарч ирсэн асуудал юм билээ. Та нар хоорондоо ярилцсан юм шиг байна. Манай яаманд ийм тооцоо судалгаа ирээгүй. Ер нь төсөв нэгэнт өргөн барьсан энэ үед бодлогын хувьд ч, тогтолцооны хувьд ч НӨАТ-ын буцаан олголтыг нэмэх боломжгүй" гэв. 

Харин энэ үеэр УИХ-ын дарга Г.Занданшатар "Б.Жавхлан сайд тойрог ярьж, улс төржихгүй шүү. Сангийн сайд тооцоо судалгаагаа яривал ярь. УИХ-ын онцгой бүрэн эрхэд халдахгүй шүү. Гишүүдийн ярьж байгаа санал бодолд хүндэтгэлтэй хандаж сур. Тойрог гэж юу яриад байгаа юм. УИХ-ын гишүүдийн үг хэлэх эрхэнд бүү халд" хэмээн зандрав.