УИХ-ын чуулганы хуралдаанаар томилгооны сонсголын талаарх Үндсэн Хуулийн Цэцийн 05 дугаар дүгнэлтийг хэлэлцэж байна.

ҮХЦ болон Байнгын хороод дүгнэлтээ танилцуулж дууслаа. Одоо гишүүд асуулт асууж, үг хэлж өндөрлөснөөр санал хураа.

Эцэст нь ҮХЦ-ийн 2023 оны 05 дугаар дүгнэлтийг хүлээн зөвшөөрөх боломжгүй гэж үзэн, УИХ-ын тогтоолыг батлав.

Энэ талаар тодруулбал 2023 оны есдүгээр сарын 27-ны өдөр болсон ҮХЦ дунд суудлын хуралдаанаар цэцийн гишүүнийг томилохын өмнө нээлттэй сонсгол зохион байгуулах хуулийн зохицуулалт нь Үндсэн хууль зөрчсөн гэж үзсэн. Түүнчлэн Монгол Улсын Ерөнхий прокурор, Улсын дээд шүүхийн шүүгчийг томилохын өмнө УИХ нэр дэвшигчийн сонсгол хийх нь Үндсэн хууль зөрчсөн гэж үзсэн юм. Энэхүү дүгнэлтийн Хууль зүйн байнгын хороо болон Төрийн байгуулалтын байнгын хороо хүлээн зөвшөөрөх боломжгүй гэж дүгнэсэн. 

УИХ-ын өнөөдрийн хуралдаанаар гишүүдийн ихэнх нь байнгын хороодын дүгнэлтүүдийг дэмжих нь зүйтэй гэж үзэв.

 

Г.Занданшатар: Маргааш болох хуралдаанаар Хүүхдийн эрхийг хамгаалах асуудлыг хэлэлцэх зайлшгүй шаардлагатай

Улсын Их Хурал(УИХ)-ын нэгдсэн чуулганы Пүрэв гарагийн хуралдаан эхэллээ.

Өнөөдрийн хуралдаанаар 

• “Төрөөс мөнгөний бодлогын талаар 2024 онд баримтлах үндсэн чиглэл батлах тухай” Улсын Их Хурлын тогтоолын төсөл /Монголбанк 2023.09.25-ны өдөр ирүүлсэн, хэлэлцэх эсэх/
• Зохицуулах үйлчлэлтэй хүнсний тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2022.04.14-ний өдөр өргөн мэдүүлсэн, хэлэлцэх эсэх/
• Монгол Улсын Үндсэн хуулийн цэцийн 2023 оны 05 дугаар дүгнэлт
• Улсын дээд шүүхийн шүүгчид нэр дэвшигчтэй танилцана.

Мөн Шинэ сэргэлтийн бодлогод тусгагдсан зам, тээврийн салбарын төсөл, арга хэмжээний хэрэгжилтийн талаарх Ерөнхий сайдын мэдээллийг сонсоно.

УИХ-ын дарга Г.Занданшатар "Хэлэлцэх асуудалтай холбогдуулан маргаашийн хуралдаанаар хүүхдийн эрхийг хэлэлцэх зайлшгүй шаардлага гарч байна. Хүүхдийн эрх зөрчигдөж байгаа асуудал онцгой анхаарал татаж байна. Бараг өдөр бүр хүүхдийн эрх зөрчигдсөн тухай мэдээлэл гарах боллоо.

Хүүхэд авто замын ослын хохирогч болж байна, амь насаа алдаж байна, бусдад дээрэмдүүлж байна. Гэр бүл болон бусад орчинд хүчирхийлэлд өртөж байна. Гэр орондоо угаартаж байна.

Өчигдөр мэдээлэгдсэнээр хүний наймааны 20 гаруй хэрэг бүртгэгдсэнээс найм нь насанд нь хүрээгүй хүүхэд хохирсон байна. Дорноговь аймагт 12 настай охин алга болоод хоёр хонолоо. Эрэн сурвалжилж байгаа ч хараахан үр дүн гараагүй байна. 

Сүүлийн 10-аад хоногт гэхэд 13 настай охин сургуулийнхаа урд машинд дайруулсан, 7 настай хүүхэд хойд эцгийнхээ гарт амь үрэгдсэн, бага насны гурван хүүхэд ээжийнхээ хамт угаартсан, энэ сарын 2-нд орон сууцны хотхоноос 7 болон 5 настай хүүхэд унаж амиа алдсан зэрэг аймшигтай үйлдэл, гэмт хэргүүд гарлаа" гэв.