Монгол Улсын анхны Ерөнхийлөгч П.Очирбатад өргөө барихаар төсвөөс хөрөнгө гарган Сүхбаатар дүүргийн нутаг дэвсгэр буюу Гэрлэх ёслолын ордны дэргэд газар олгож байжээ. 

Тэгвэл тус газар дээр барилгын ажил эхэлсэн байна. Ямар зориулалтын барилга баригдаж буйг Нийслэлийн Ерөнхий архитектор, Хот байгуулалт, хөгжлийн газрын даргаас утсаар тодруулахад "Уг газар дээр барилга барих гэж олон жил шүүхээр явсан асуудал бий. Манай байгууллагын сайтаар ороод мэдээлэл авч болно" гэсэн юм. 

Харин уг мэдээллийг Хот байгуулалт, хөгжлийн газрын төлөвлөгдсөн барилга байгууламжийн мэдээллийн сангаас нягтлахад "23 давхар Интернэйшнл центр оффис үйлчилгээний төв" баригдана гэсэн мэдээлэл байна. 

2013 онд батлагдсан архитектур төлөвлөлтийн даалгаврын дугаараар нь шүүж үзэхэд "М Си Эс пропертийз холдинг ХХК"-ны барилга аж. 

Тус компани нь уг газрыг 2012 онд авч 2014 оны дөрөвдүгээр сард барилгын ажил эхлүүлэх, үргэлжлүүлэх зөвшөөрлөө авч байжээ.