Жижиг, дунд үйлдвэрийн газрын дарга Я.Эрдэнэсайхан, Бодлого, зохицуулалтын хэлтсийн дарга А.Гэрэлзаяа нар Дэлхийн банкнаас санхүүжүүлсэн “Экспортыг дэмжих төсөл”-ийн удирдагч ноён Тиласони Бенжамин Мусуку болон албаны бусад төлөөлөгчидтэй уулзалт хийлээ. Уулзалтын үеэр 2023 оны 12 сард дуусан хаагдаж байгаа уг төслийн хэрэгжилт, хэрэгжиж дууссан гэрээ, төсөл хэрэгжсэнээр гарч байгаа үр дүн, үр шим, сургамжын талаар хэлэлцлээ. 

Төсөл хэрэгжсэнээр 1000 гаруй аж ахуйн нэгж өргөдөл гарган оролцсоноос 76 аж ахуйн нэгж төсөлд хамрагдахаар сонгогдож, үр шимийг хүртэн экспортод бараа бүтээгдэхүүнээ гаргахаар бэлтгэж байсан жижиг, дунд үйлдвэрлэл эрхлэгчид экспортод бүтээгдэхүүнээ гаргаж, зарим нь бүтээгдэхүүнээ экспортод гаргах бэлтгэл ажил, борлуулалтын хэмжээ, ажлын байрны тоо, улсад оруулах татварын хэмжээ өсөн нэмэгдсэн гэх мэт бодит үр дүн гарч байгааг дурдсан юм. 

Мөн Дэлхийн банкны төслийг үр дүнтэйгээр хэрэгжиж, хувийн хэвшлийн байгууллагуудад бодитоор хүргэх чиглэлд өөрсдийн боломжит хүчин чармайлт, идэвхийг гарган ажиллаж байгаа тухайгаа онцоллоо. 

Ноён Тиласони Бенжамин Мусуку Дэлхийн банкны санхүүжилтээр уул уурхайн бус бизнес эрхлэгчдийг дэмжих чиглэлээр дараагийн төсөл хэрэгжихээр яригдаж байгаа, өмнөх төслийн хэрэгжилтийн явц, үр дүн, сургамжаас дүгнэлт хийн цогц төлөвлөгөө гарган хувийн хэвшлийн компаниудтай шууд харилцан ажилладаг засгийн газрын байгууллагатай хамтран ажиллах зорилготой байгаа талаар санал солилцов. 

Мөн хоёр тал төсөл хэрэгжиж дуусч байгаатай холбогдуулан төсөлд хамрагдсан байгууллагуудын анхны бодит байдал, хөрөнгө оруулалтаар нэмэгдэж тоног төхөөрөмж, үр дүнг дурдсан тайланг олон нийтэд хүргэх талаар арга хэмжээ авах талаар санал нэгдэж, 2023 оны 11 сард дараагийн уулзалт хийхээр товлов.