Стандарт, Хэмжил Зүйн Газар (СХЗГ)-аас "Иргэдэд ойр стандарт" нээлттэй хаалганы өдөрлөгийг энэ сарын 28-нд Сүхбаатарын талбайд зохион байгуулах гэж буй талаараа мэдээлэл өглөө. 

Уг өдөрлөгөөр СХЗГ болон орон нутгийн 21 хэлтэс өөрсдийн үйл ажиллагаагаа нээлттэйгээр танилцуулах аж. 

Түүнчлэн СХЗГ-аас үйлчилгээ авдаг тохирлын гэрчилгээтэй, чанараараа тэргүүлдэг 21 аймгийн болон нийслэлийн 100 гаруй аж ахуйн нэгжүүд үзэсгэлэн худалдаа явуулах юм байна. 

Жишээлбэл уг үзэсгэлэн худалдаагаар үнэт метал, эрдэнийн чулуугаар хийсэн эдлэл үйлдвэрийн үнээр худалдаалагдах аж. 

Мөн Монгол Улсад хэрэгжиж буй 6,557 стандарт болон тэдгээрийн үр өгөөжийн талаар иргэдэд нээлттэйгээр танилцуулахаар болжээ. 

Стандартыг зөвхөн СХЗГ боловсруулдаг биш нийгмийн бүхий л төлөөлөл боловсруулж хяналт тавих боломжтой учир тэдний дуу хоолойг сонсож стандартуудаа сайжруулах зорилгоор уг нээлттэй хаалганы өдөрлөгийг зохионо гэдгийг Стандарт тохирлын үнэлгээний бодлогын газрын дарга н.Тулга онцлон хэллээ.  

Өдөрлөгийн үеэр иргэдэд стандарт хэмжилзүйн үр өгөөжийн талаар мэдлэг, ойлголтыг өгөх сургалт зохион байгуулах юм байна.