УИХ-ын дарга Г.Занданшатарын урилгаар Лаос улсын Үндэсний Ассамблейн дарга С.Фумвихан манай улсад айлчилж байна. Цар тахлын дараагаас Монгол Улс төдийгүй дэлхийгээрээ хөл хөдөлгөөнд орж, улс орнуудын улс төр, эдийн засгийн харилцаа сэргэж ирсэн.  Тэр тусмаа манай улсад дэлхийн нэр хүнд бүхий орны удирдагчид шил дараалан ирэх боллоо.

Саяхны Гэгээн ширээт улсын тэргүүн папын айлчлал Монгол Улсыг дэлхийд таниуллаа. Мөн Лоасын Ассамблейн дарга айлчилж байна.

Лаос Улсын эдийн засгийн  сүүлийн жилүүдэд өсөж, хурдацтай  хөгжиж буй зүүн азийн орнуудын нэг. 2021 онд БНХАУ-тай өндөр хурдын галт тэрэгний замаар холбогдсоноос хойш эдийн засгийн өсөлт эрс нэмэгдсэн байна.  Зүүн өмнөд Азийн хуурай газрыг холбосон дамжин өнгөрөх энэхүү тээврийг нэмэгдүүлэхийн тулд ачаа тээвэрлэлтийг хөнгөвчлөх, зардлыг бууруулах, бүтээн байгуулалтыг хөгжүүлж эдийн засгаа хөгжүүлэх зорилт дэвшүүлсэн байна.   Лаос Улс 2024 онд болох АСЕАН-ы дээд хэмжээний уулзалтыг гурав дахь удаагаа зохион байгуулахаар нэрээ дэвшүүлжээ.  Тус улс нь 2004-2005 онд болон 2016 онд АСЕАН-ы дээд хэмжээний уулзалтыг зохион байгуулж байсан туршлагатай орон ажээ. Лаосчуудын дийлэнх нь хөдөө орон нутагт амьдардаг бөгөөд 80 орчим хувь нь хөдөө аж ахуй эрхлэн, голчлон цагаан будаа тариалан амьдарч байна. Тус улс усан цахилгаан станц байгуулах том зорилт тавьсан бөгөөд Зүүн өмнөд Азийн эрчим хүчний гол эх үүсвэр болох хүсэл эрмэлзэлтэй̆ байдаг. 2025 он гэхэд усан цахилгаан станц улсын орлогынх нь хамгийн том эх үүсвэр болно гэж Засгийн газар нь тооцоолж байна. Монголчууд бид энэ улсын талаар нарийн ширийн зүйл сайн мэдэхгүй хэдий ч “Сая зааны орон” гэдэг алдрыг өгсөн билээ. Тиймээс Лоас улстай ойртон нөхөрлөж, худалдаа, эдийн засгийн салбарт хамтран ажиллах таатай боломж байна. Мөн лаосчууд манай улс 10 мянган га газар өгвөл цагаан будаа тариалж өгье хэмээн санал тавиад байгаа юм байна.