Ардчилсан нам ойрын хугацаанд Ерөнхий нарийн бичгийн даргаа томилно гэж Л.Гантөмөр Төрийн ордонд хийсэн хэвлэлийн бага хурлын үеэрээ сэтгүүлчдэд дуулгажээ. Тэрбээр “Ерөнхий нарийн бичгийн даргаар хэнийг томилох нь АН-ын даргын бүрэн эрхийн асуудал” гэж тодотгосон нь ерөнхийдөө түүний хүн генсекийн суудалд сууна гэсэн үг аж. Харин “түүний хүн нь” хэн байж болох вэ?.  Энэ асуулт АН дахь шинэ зодооны эхлэлийг тавьж байна.

Өнгөрөгч наймдугаар сард АН-ын Үндэсний бодлогын хороо хуралдаж, тэргүүн дэд даргаар С.Баярцогтыг томилж, түүн дээр 15 дэд даргатай болсноор сүрэг бүтэн чоно цатгалан тарцгаасан. Гэвч, сүргийн бүрэн бүтэн байдал цаашид хэр урт удаан хугацаанд үргэлжлэхийг таашгүй, хэвлэлээр цацагдаж буй сэдэв болон сэвээг харахад  Л.Гантөмөрийн гал тогоог хэн базахаас олон зүйл хамаарна.

Улс төрийн бор, шар мэдээ болгон ардаа эзэнтэй, ашиг сонирхолтой байдаг хойно, нийслэлийн АН-ын даргаар Д.Бадарсанг түр томилсон гэх мэдээлэл Э.Бат-Үүл баатарыг гомдоожээ. Мэдээж, овоог нь босгосон учраас л шаазгай шагширсан биз.

АН-ын дарга Л.Гантөмөр хоёр хоногийн өмнө Улс төрийн зөвлөлийг хуралдуулахдаа  генсек болон нийслэлийн АН-ын даргын үүрэг гүйцэтгэгчийг томилох санал гаргасан нь ийнхүү “гэрэлд цохиулж”, намаа хагалах дээрээ хүрсэн бололтой. АН-ын дүрмээр Ерөнхий нарийн бичгийн даргын томилохдоо Л.Гантөмөр ҮБХ-ны хуралдаа танилцуулах ёстой. Харин нийслэлийн АН-ын даргыг нийслэлийн намын хорооны хурлаар сонгоно. Л.Гантөмөр энэ үйлдлийг улс төрийн хүрээнд МАН-ын дотоод зодоонтой холбоотой гэж хардагдаж, харагдаж байгаа бололтой.

АН  ДАХЬ МАН-ЫН УЛС ТӨР

МАН наанаа нам гүм байгаа мэт боловч цаанаа нөхөр-дайсан болоод удаж байгаа билээ. Улс төрд үүдийн нөхөр, дайсан үгүйг батлах мэт У.Хүрэлсүх, Л.Оюун-Эрдэнэ хоёрын эрх ашиг салсан тухай мэдээллүүд ч сэвэгдэх болсон. Хэдий У.Хүрэлсүх улс төрийн тайзан дээр гоцлохгүй байгаа ч хөшигний арын гол найруулагч хэвээрээ бий. Засгийн газраас намрын чуулганаар  Шүүхийн тухай хуулийн төслийг  УИХ-д өргөн барих болсон нь У.Хүрэлсүхийг “шүдгүй арслан” болгох тухай л юм.

Хэнтийн хуурай ах, дүү хоёрын далд зодоонд МАН-ын фракциуд төдийгүй АН-ын фракциуд ч татагдан орох болсон. АН-дахь У.Хүрэлсүхийн фракци нь Л.Гантөмөр, С.Баярцогт бол Л.Оюун-Эрдэнийнх Х.Баттулга гэж харагдах болсон.

Их тэнгэр сөрөг хүчний дарга Л.Гантөмөрийг дуудаж “чиглэл” өгдөг гэх яриа хэрэвзээ үнэний ортой бол АН-ын энэхүү механик эвлэрэл тун удахгүй гэсэн үг.  Үндсэндээ тамга, тэмдгээ өөрийн болгосон хэдий ч Л.Гантөмөр нам дахь “власть”-аа бүрэн аваагүй байгаагийн илрэл нь Ерөнхий нарийн бичгийн даргын томилгоо. Тэрбээр ҮБХ-ны хурлаараа С.Баярцогтыг генсекээр томилуулахаар тохирсон ч Женко.Баттулгын эсэргүүцэлтэй тулгарч тэргүүн дэдийн суудлыг өгсөн гэх хөшигний арын мэдээ байна.

                  Л.ГАНТӨМӨРИЙН ЭХЛҮҮЛСЭН  АН ЦАВ

Х.Баттулгад АН-ын дэд даргын суудлын долоог нь өгсөн ч сэтгэл ханаагүй, Э.Одбаярыг Ерөнхий нарийн бичгийн дарга болгох шахаа үзүүлэх болсон гэх. Э.Одбаярыг АН-д анх хөтлөн оруулсан хүн нь С.Эрдэнэ. Гэхдээ түүнийг МАН+Женко фракцийнх гэж намынхан нь ярьдаг нь оргүй хардлага биш байх.  Төрийн ордны Зүүн жигүүрийн хоёр давхраар гүйдэлтэй болсон түүнтэй Л.Гантөмөр хувийн ойр харилцаатай гэх мэдээлэл ч байгаа. Ямар ч байсан 4:11 хэвлэлийн хурлын үеэрээ “Ерөнхий нарийн бичгийн даргаар хэнийг томилох нь АН-ын даргын бүрэн эрхийн асуудал” гэсэн нь намынхандаа хаягласан үг нь болох нь ойлгомжтой байна. Л.Гантөмөр Э.Одбаярыг оруулж ирлээ гэхэд АН-д бор зүрхээрээ зүтгэж яваа залуусын дэмжлэгийг авч чадахгүй. Гэх мэтчилэн Л.Гантөмөр жинхэнээсээ “хальсгүй өндөг”-өө хагалж мэдэхээр байна.  Ийм учраас л АН-д АН-ын генсек хэрэгтэй гээд байгаа хэрэг.

Нийслэлийн АН-ын дарга Э.Бат-Үүлийн жиргээнээс харахад АН-д ан цав үүсэв үү гэх асуулт тавигдана.  Энэ асуултад хариулахдаа АН-ын дарга Л.Гантөмөр нийслэлийн АН-ын даргыг сонгуулиар шийднэ гэсэн. Гэхдээ Э.Бат-Үүл хэвлэлийн ховонд гоморхох хэмжээний улстөрч биш. Д.Бадарсанг /СБД-ийн Засаг дарга асан/ яриа яригдсан, зурагдсан болохоор тэр.

Ирэх 30 жилийг зурах Л.Гантөмөрийн стратеги арай гэж эвлэрсэн АН-ыг битгий тараачихаасай билээ.


Эх сурвалж:news.mn
Эх сурвалж:news.mn