Монгол Улсын Засгийн газрын гишүүн, Батлан хамгаалахын сайд Г.Сайханбаяр 2023 оны 09 дүгээр сарын 06-ны өдөр Бүгд Найрамдах Хятад Ард Улсаас Монгол Улсад суугаа Онц бөгөөд Бүрэн эрхт Элчин сайд ноён Цай Вэньруйгийн үүрэгт ажил дуусгавар болж нутаг буцаж байгаатай холбогдуулан түүнийг хүлээн авч уулзлаа.

Уулзалтын эхэнд Батлан хамгаалахын сайд Г.Сайханбаяр ноён Цай Вэньруйг 1986 оноос эхлэн Монгол Улсад томилогдож, 2020 оноос Элчин сайдаар ажиллах хугацаандаа хоёр улсын харилцаа, тэр дундаа батлан хамгаалахын салбарын харилцаа, хамтын ажиллагааг хөгжүүлж, шинэ шатанд гаргахад дэмжлэг үзүүлж ирсэн явдалд талархал илэрхийллээ. 

Ноён Цай Вэньруй хэлэхдээ Монгол-Хятадын харилцаанд батлан хамгаалах салбарын харилцаа хамтын ажиллагаа гол цөм бөгөөд хоёр улсын цэрэг, цэрэг-техникийн хамтын ажиллагаа амжилттай хөгжиж байгаа хэмээн онцолсон юм. 

Уулзалтын төгсгөлд Батлан хамгаалахын сайд Г.Сайханбаяр, ноён Цай Вэньруйгийн хоёр улс хоорондын батлан хамгаалах салбарын хамтын ажиллагааг хөгжүүлэхэд оруулсан хувь нэмрийг үнэлж “Цэргийн хамтын ажиллагааны төлөө” хүндэт тэмдгээр шагнаж, түүний цаашдын ажилд амжилт хүсэв.