МАН-ын Бага хурал өндөрлөж, УИХ-ын 18, 28 дугаар тойрогт нэр дэвших улстөрчийг тодрууллаа. Нөхөн сонгууль явуулах нь тодорхой болсноос хойш тус намд горилогчдын бүлэг бий болсон. Хэнтийн 18 дугаар тойрогт хуульч Л.Батжав, МИАТ-ийн дэд захирал асан Н.Энхбаатар, Хэнтийн аймгийн Засаг дарга асан Н.Ганбямба, УИХ-ын гишүүн асан Д.Гантулга, СХД-ийн 28 дугаар тойрогт нийслэлийн Засаг даргын орлогч Ж.Сандагсүрэн, НИТХ-ын төлөөлөгч асан С.Мөнхчулуун нар нэр дэвших амбийцаа ил тод илэрхийлж байлаа. Гэвч тэдний дэвших магадлал анхнаасаа бага байсан бөгөөд тэр ч ёсоор боллоо.

Ц.Идэрбат.

Бага хурлаас өмнө Удирдах зөвлөл нь хуралдаад 18 дугаар тойрогт Хэнтий аймгийн Засаг дарга Ц.Идэрбат, 28 дугаар тойрогт Э.Батшугар нарын нэрийг оруулан шууд санал хураалгахаар болсон юм. Ингэснээр Бага хурлыг нэр дэвшигчийг тодруулах биш, батламжлах хурал болгож орхилоо. Удирдах зөвлөл Бага хурал хуралдахаас ганцхан цагийн өмнө буюу 16.00 цагт товлогдоод хэдхэн минутын дотор шийдвэр гаргасан нь асуудал эхнээсээ тодорхой байсныг илтгэж байгаа юм. Бага хурал санаснаас удаан үргэлжилсэн ч эцэстээ нэр дэвшигч Ц.Идэрбатыг 97.8, Э.Батшугарыг 95 хувийн саналаар дэмжин, нэр дэвших эрх олголоо. 

Ц.Идэрбат өмнө нь УИХ-ын сонгуульд өрсөлдөж байгаагүй бол Э.Батшугар одоо нэр дэвших гэж байгаа тойрогтоо 2020 онд нэр дэвшин 28 гаруй хувийн санал авч байв. Хэдий өмнөх сонгуульд өндөр санал авсан ч Э.Батшугарыг МАН-аас нэр дэвших эрх авахад Н.Энхбаярын нөлөө байсан нь тодорхой юм.