УИХ-ын сонгуулийн 18 /Хэнтий аймаг/, 28 /Нийслэлийн СХД/ дугаар тойрогт болох нөхөн сонгуульд өрсөлдөх эрхийг СЕХ С.Эрдэнийн ардчилсан намд олгосон билээ. Тэгвэл тус намаас нөхөн сонгуульд нэр дэвшигчид тодорчээ.

Эх сурвалжийн мэдээлснээр, намын Үндэсний бодлогын хорооноос УИХ-ын сонгуулийн 18-р тойрог буюу Хэнтий аймагт УИХ-ын гишүүн асан Б.Гарамгайбаатар,  28м дугаар тойрогт Улсын баатар Э.Бат-Үүл нэр дэвшихээр болсон байна. Энэ хоёр улстөрч 2020 оны ээлжит сонгуульд хоёул Хэнтий аймагт өрсөлдөөд ялагдсан юм.

АН-аас нэр дэвшигчдээ албан ёсоор тодруулж дууссаны дараа өнөөдөртөө багтаж Сонгуулийн ерөнхий хороонд танилцуулах юм байна. Нөхөн сонгуульд нэр дэвшигчийг тодруулах хуулийн хугацаа өнөөдөр 00.00 цагт дуусгавар болж байгаа бөгөөд эрх баригч МАН 17.00 цагт эхлэх Бага хурлаараа нэр дэвшигчийн асуудлыг хэлэлцэх болсон талаар бид өмнө нь мэдээлсэн билээ.