Энэ оны 07 дугаар сарын 25-ны өдөр зохион байгуулагдсан тус уулзалтад Цагдаагийн байгууллагыг төлөөлж, Цагдаагийн ерөнхий газрын даргын зөвлөлийн гишүүн, Мөрдөн байцаах албаны дарга, цагдаагийн хурандаа Н.Мишигдорж, мөн албаны Хүүхдийн эсрэг болон хүүхдээс үйлдсэн гэмт хэрэг мөрдөх хэлтсийн дарга, цагдаагийн хошууч Д.Нямрагчаа, Кибер гэмт хэрэг мөрдөн шалгах хэлтсийн дарга, цагдаагийн хошууч Ж.Билгүүтэй, ЦЕГ-ын Гадаад харилцаа, энхийг сахиулах ажиллагааны хэлтсийн даргын албан үүргийг түр орлон гүйцэтгэгч, цагдаагийн дэд хурандаа О.Бат, мөн хэлтсийн мэргэжилтэн, цагдаагийн дэслэгч Т.Баатарсүрэн нар, зочин төлөөлөгчөөр АНУ-ын Холбооны Мөрдөх товчооны Бээжин хотноо суугаа хуулийн атташег түр орлон гүйцэтгэгч Жон Ким, АНУ-ын ЭСЯ-ны Хууль Сахиулах Ажлын зөвлөх П.Даваажаргал нар оролцлоо. 

Тус уулзалтын хүрээнд цаашид тодорхой төрлийн гэмт хэрэгтэй тэмцэх, урьдчилан сэргийлэх чиглэлээр 2 талын  хамтын ажиллагааг өргөжүүлж, мөрдөн шалгах ажиллагааны чухал оролцогч болох мөрдөгч нарын ур чадварыг нэмэгдүүлэхэд хамтран ажиллах талаар санал солилцлоо. 

Түүнчлэн энэ оны 09 дүгээр сарын 11-21-ний өдрүүдэд Холбооны мөрдөх товчооноос зохион байгуулагдах “Pacific Training Initiative” сургалтад цагдаагийн байгууллагаас 2 алба хаагч хамрагдахаар төлөвлөөд байна.  Уг сургалтад хамрагдсанаар Холбооны мөрдөх товчооны үйл ажиллагааны тухай мэдээлэл, гэмт хэргийн илрүүлэлт, мөрдөн шалгах ажлын арга, тактик зэрэг онол, арга зүйн олон улсын стандартын хүрээнд мэдлэг олгох ач холбогдолтой юм.