Бөхийн төрлүүдийн энэ оны насанд хүрэгчдийн Ази тивийн АШТ Казахстаны Астана хотноо болж байна. Тэмцээн энэ сарын 9-нд сонгомол бөхийн төрлөөр эхэлсэн бөгөөд манайхны гол найдлага тавьдаг чөлөөт бөхийн тэмцээн өнөөдөр эмэгтэйчүүдийн 50, 55, 59, 68, 76 кг-ын жингийн барилдаанаар эхэллээ. Дээрх жингүүдэд манай улсаас ОУХМ Ц.Намуунцэцэг, Ч.Отгонтуяа, Х.Болортуяа, Э.Дэлгэрмаа, Г.Ариунжаргал нар барилдсанаас 55 кг-ын жинд Ч.Отгонтуяа ганцаараа алтан медалийн төлөө барилдахаар шалгарлаа.

Бид та бүхэндээ өнөөдөр дэвжээнд гарсан бөхчүүдийнхээ хэрхэн барилдсаныг танилцуулж байна.

50 кг. ОУХМ Цогт-Очирын Намуунцэцэг эхний даваанд “Осло 2021” ДАШТ, “Улаанбаатар 2022” Азийн АШТ-ий аварга, Японы бөх Ремина Ёшимотой учраа таарч 0:10 оноогоор цэвэр ялагдав. Түүнийг ялсан япон бөх дараа нь БНХАУ-ын Зичи Фенгийг 10:2, Энэтхэгийн Нилам Ниламыг  цэвэр /Оноо нь 8:0/ ялан аваргын төлөө шалгарсан тул манай бөх дагаж барилдахаар болов. Ц.Намуунцэцэг үдээс хойш БНХАУ-ын бөхтэй барилдаж, цэвэр ялагдан тэмцээнээ дуусгалаа.

Алт: Ясмина Иммаева /Узбекистан/- Ремина Ёшимото /Япон/

Хүрэл: Нилам Нилам /Энэтхэг/-Зичи Фенг /БНХАУ/, И Жин Чен /БНХАУ-ын Тайвань/-Миран Чеон /БНСУ/

55 кг. Чинболдын Отгонтуяа хагас шигшээд Казахстаны Мария Седневаг 10:0 оноогоор цэвэр ялж, БНХАУ-ын Панг Чианюутай алтан медалийн төлөө барилдахаар боллоо.

Алт: Ч.Отгонтуяа /Монгол/-Панг Чианюу /БНХАУ/

Хүрэл: Нгуен Ти Ми Транг /Вьетнам/-Мария Седнева /Каүахстан/, Шохида Ахмедова /Узбекистан/-Рионо Катаока /Япон/

59 кг. ОУХМ Х.Болортуяа гурван өрсөлдөгчдөө бүгдэд нь хожигдсон.

Алт: Жумолага Жумолага /БНХАУ/-Юүи Сакано /Япон/

Хүрэл: Кальмира Билимбек Кызы /Киргизстан/-Дайана Каюмова /Казахстан/ 

68 кг. ОУХМ Энхсайханы Дэлгэрмаа шөвгийн наймд Энэтхэгийн Ниша Нишатай таарч 10:10 сүүлийн оноогоор хожигдсөн. Энэтхэг бөх дараагийн даваанд БНХАУ-ын бөх Фен Жоуг 7:6-гаар хожин аваргын төлөө гарсан тул манай бөх хятад бөхтэй хүрэл медалийн төлөө барилдахаар боллоо.

Алт: Ами Иший /Япон/-Ниша Ниша /Энэтхэг/

Хүрэл: Э.Дэлгэрмаа /Монгол/-Фен Жоу /БНХАУ/, Елена Шалыгина /Казахстан/-Меерим Жуманазарова /Киргизстан/

76 кг. Г.Ариунжаргал шөвгийн наймд Японы Мизүки Нагашиматай барилдаж 4:3-аар хожигдсон. Япон бөх дараа нь Киргизстаны Айпери Медет Кызыд хожигдсон тул манай бөхийн тэмцээн дууслаа.

Алт: Эльмира Сыздыкова /Казахстан/-Айпери Медет Кызы /Киргизстан/

Хүрэл: Прия Прия /Энэтхэг/-Мизуки Нагашима /Япон/, Озода Зарипбоева /Узбекистан/-Жуан Ванг /БНХАУ/