Солонгос-Америк дуучин, реппер Jay Park-ийн үүсгэн байгуулсан More Vision энтертайнмент компанийн анхны эрэгтэй хамтлаг LNGSHOT албан ёсоор дебют хийлээ. Тус хамтлаг 2026 оны нэгдүгээр сарын 13-нд Сөүл хотноо дебютээ хийж, анхны уран бүтээлээ олон нийтэд танилцуулсан байна.

LNGSHOT нь дөрвөн гишүүнтэй бөгөөд Ohyul, Ryul, Woojin, Louis нараас бүрдэнэ. Тэд дебютын хүрээнд анхны мини альбом “Shot Callers”-оо гаргасан бөгөөд уг цомгийн гол дуу нь “Moonwalkin’” юм. Альбомд рэп, R&B, поп хэв маягийг хослуулсан уран бүтээлүүд багтсан нь хамтлагийн өнгө төрхийг тодорхойлж буйг гадаадын хэвлэлүүд онцолжээ.

Дебют шоукейст Jay Park өөрөө оролцож, LNGSHOT-ийг уламжлалт K-pop хэв маягаас илүү “street” болон артист төвтэй хамтлаг болгон хөгжүүлэх зорилготой байгаагаа илэрхийлсэн байна. Мөн гишүүд өөрсдийн оролцоотойгоор уран бүтээлээ бүтээхийг чухалчилж байгааг дурдсан аж.

LNGSHOT нь дебютээсээ өмнө микстэйп болон тайзны хамтарсан үзүүлбэрүүдээрээ олон нийтийн анхаарлыг татаад байсан бөгөөд Jay Park-ийн удирдлага дор гарч буй анхны эрэгтэй хамтлаг гэдгээрээ K-pop салбарт онцгой хүлээлт үүсгээд байна.