1. Хамгийн эхэнд хөрснөөс шинжилгээ авдаг. 
2. Нүхээ стандартын дагуу ухах ёстой.
3. Хэзээ ч том мод авчирч суулгадаггүй. 
4. Товлосон цагт усалгааны баг орж ирэхийг тооцоолно. 
5. Төлөвлөгөөний дагуу ажлаа гүйцэтгээгүй тохиолдолд торгуулна.
6. Модны эмч нар ямар дусал, шингэн хийх хэрэгтэйг зөвлөдөг.
7. Хөрс нь хагарвал тусгай багажаар тэгшилнэ. 
8. "Үлдэх зай"-г орхино.
9. Эргээд хяналтгүй бол мөнгө ч үгүй, мод ч үгүй хоосон үлдэх эрсдэлтэй
 

Мод тарина гэдэг бол хэн дуртай хүний хийх ажил биш.

Ухсан нүхэндээ модоо суулгаж, услаад л орхидог амархан ажил шиг санаж огт болохгүй. Хятадад мод тарихдаа 95 хувиас доош ургуулбал хариуцлага хүлээж, торгуулдаг. Хууль дүрмийг ягштал мөрдөж, хоорондоо уялдаа холбоотой ажиллахын үр нөлөө шууд мэдрэгддэг гэдгийг ойн аж ахуй эрхлэгч хэлж байв. 

Өвөр Монголын Өөртөө Засах Орон (ӨМӨЗО)-ны хүлэмжийн аж ахуй, цагаан идээ боловсруулах арга болон тэдний мод тарих, ургуулах туршлагыг сурвалжлахаар Хөх хотыг зорьсон юм. 

Хөх хотод нарс мод их байгаа харагдана. Харин хотоос зайдуу газарт хайлаас элбэг аж.

"Чийг сайтай байвал мод өндөр ургана. Гэхдээ чийгийг тогтмол хадгалах нь чухал. Нэг удаа услаад орхиод явж болохгүй. Тиймээс ч Хөх хотод модны усалгаа, арчилгааг тогтмол хариуцсан мэргэжлийн хүмүүс ажилладаг" хэмээн нутгийн тариаланч хэлсэн юм. 

Хятадын Жинань, Эрээн болон Өвөр Монголын Хөх хот, Ордос, Дөрвөд хошуунд дөрвөн жил гаруй хугацаанд мод тарьсан ойн аж ахуй эрхлэгч иргэний туршлагыг уншигч Танд хүргэж байна. Хамгийн чухал алхам бол нарийн төлөвлөгөө, үе шат, уялдаа холбоотой ажиллах арга барил гэдгийг яриандаа онцолж байв.  

Мод тарьж, арчлах талаар тэрбээр дараах мэдээллийг өгсөн юм.