ОХУ-Украины зөрчил, мөргөлдөөнөөс шалтгаалан дээрх хоёр улсаас манай улсад орж ирдэг 146 төрлийн эмийн нийлүүлэлт, цар тахлын дэгдэлт гарсантай холбоотойгоор БНХАУ-аас орж ирдэг эм, эмнэлгийн хэрэгсэл тасалдах эрсдэл үүсжээ. Эрүүл мэндийн сайд С.Энхболд өчигдөр Улсын онцгой комиссын хуралдаанд мэдээлэл хийхдээ энэ талаар онцолсон байна. 

УОК өчигдрийн хуралдаанаараа коронавируст халдвараас урьдчилан сэргийлэх, тэмцэх хариу арга хэмжээ авахтай холбоотой бүхий л үйл ажиллагааг цаашид ЭМЯ, ХӨСҮТ-д хариуцуулж, нэгдсэн удирдлага, зохион байгуулалтаар хангаж ажиллах шийдвэр гаргасан юм. Ингэхдээ үүссэн нөхцөл байдлын үед авч хэрэгжүүлж буй арга хэмжээний талаарх шаардлагатай мэдээллээр Улсын онцгой комиссыг тогтмол хангаж ажиллахыг Эрүүл мэндийн сайд С.Энхболд, ХӨСҮТ-ийн захирал Ц.Билэгтсайхан нарт үүрэг болгожээ.