Хавдар судлалын үндэсний төвөөс хавдрын эсрэг дэлхийн өдрийг угтан хорт хавдрын өвчлөл, тусламж үйлчилгээний талаар мэдээлэл хийлээ.

ДЭМБ-ын байгууллагын мэдээллээр 2023 оны байдлаар 185 орны хорт хавдрын өвчлөл, нас баралт нь хөх, түрүү булчирхай, уушги, бүдүүн шулуун гэдэс, умайн хүзүүний хорт хавдрын шалтгаантай байна. Харин Монгол Улсын хувьд 2023 онд 4556 хүн хавдрын оношоор нас барсан. Энэ нь таван хүн тутмын нэг нь хорт хавдрын шалтгаанаар нас барсан гэсэн үг юм. Тухайлбал, элэгний хорт хавдрын өвчлөлөөр Монгол Улс дэлхийн 185 орноос нэгдүгээр байрт жагсаж буй. Түүнчлэн ходоодны хорт хавдрын шалтгаант нас баралтаар дэлхийд тэргүүлээд байгаа юм. Нийт хавдраар өвчлөгсдийг хүйсийн хувьд авч үзвэл  51.7 хувь нь эрэгтэй, 48.3 хувийг эмэгтэйчүүд эзэлж байна.

Эрэгтэйчүүдийн хувьд элэг, ходоод, уушги, улаан хоолой, бөөр, бүдүүн шулуун гэдэс, нойр булчирхай, тархи, давсаг, лейкеминий хавдраар өвчлөх нь түгээмэл байгаа юм. Харин эмэгтэйчүүд элэг, умайн хүзүү, ходоод, хөх, бүдүүн шулуун гэдэс, бөөр, улаан хоолой, бамбай, өндгөвч, нойр булчирхайн хавдраар өвчлөх нь түгээмэл байна.

Хорт хавдрын нас баралтын бүтэц:

• Элэг 37.6 хувь
• Ходоод 16.4 хувь
• Уушги 8.7 хувь
• Улаан хоолой 6.0 хувь
• Бүдүүн, шулуун гэдэс 4.5 хувь
• Бусад 26.8 хувь байгаа юм.