Өмнөд Солонгосын парламентад эрх баригч намыг төлөөлдөг гишүүн эмэгтэй өчигдөр орой халдлагад өртсөн байна.

Орон нутгийн цагаар 17:00 цагийн үед Сөүл хотын Ганнам дүүрэгт явж байсан гишүүн Бэй Хюн Жин рүү нэг эрэгтэй ойртож ирээд чулуугаар толгойн ар хэсэгт нь цохижээ.

Дагзнаасаа цус алдсан улс төрчийг ойролцоох эмнэлэгт хүргэсэн байна.

Сүнчунхян их сургуулийн эмнэлэг гишүүн эмэгтэй амь насанд халгүй, хөнгөн бэртэл авсан, биеийн байдал нь тогтворжсон тухай сүүлд мэдээлжээ.

Гишүүний биед халдсан этгээдийг Ганнам дүүргийн цагдаагийн газарт саатуулсан байна.

40 настай Бэй Хюн Жин өмнө нь телевизийн хөтлөгч байсан бөгөөд 2020 онд анх удаа парламентын гишүүнээр сонгогджээ.

Тэрбээр бас 2022 онд богино хугацаанд ерөнхийлөгч Юн Сүк Ёлын хэвлэлийн төлөөлөгчөөр ажиллаж байсан юм.

Өмнөд Солонгост сар хүрэхгүй хугацааны дотор хоёр дахь улс төрч халдлагад өртөж байна.

Гурван долоо хоногийн өмнө тус улсын гол сөрөг хүчин Ардчилсан Намын дарга И Жэ Мюн ажлаар Бусан хотод очихдоо хүзүүндээ хутгалуулж байв. Энэ удаагийн халдлага түүний гэрийн ойрхон газарт гарсан байна.

“Улс төрийн терроризмын аливаа үйлдлийг бид тэвчих ёсгүй. Энэ тохиолдлыг нарийн шалгаж, хатуу арга хэмжээ авах шаардлагатай” гэж И Жэ Мюн өчигдөр сошиал хуудсандаа бичээд Бэй Хюн Жинд түргэн эдгэрэхийг хүссэн байна.

Эрх баригч намын хэвлэлийн төлөөлөгч Жүн Хэ Ён мөн дээрх хэргийг нарийвчлан шалгаж, хатуу арга хэмжээ авахыг уриалжээ.

“Хүчирхийллийн гэмт хэрэг манай нийгмээс устах ёстой” гэж тэр мэдэгдсэн байна.

Өмнөд Солонгосын ерөнхий сайд Хан Дук Со хуулийн байгууллагуудад хэргийг нарийн шалгаж, бусад улс төрчдийн аюулгүй байдлыг хангаж ажиллах үүрэг өгчээ.

Эх сурвалж: Yonhap News