Нийслэл Москва болон Оросын олон хотод мянга мянган хүмүүс ирэх ерөнхийлөгчийн сонгуульд сөрөг хүчнээс нэр дэвших Борис Надеждиний төлөө гарын үсгээ зурахаар урт дараалалд зогсож эхэлжээ.

Надеждин нь Украины дайныг зогсоох мөрийн хөтөлбөртэй нэр дэвшиж байгаа юм. Иргэдийн Санаачилга намаас нэр дэвшиж буй 60 настай улс төрч энэ сард багтаан 100,000 хүний гарын үсэг цуглуулж чадвал ирэх гуравдугаар сарын сонгуульд өрсөлдөх боломжтой болно.

Даваа гарагийн байдлаар Надеждин 80,000 гаруй хүний гарын үсэг цуглуулжээ.

Түүнд гарын үсгээ өгөх хүсэлтэй иргэдийн урт дараалал Москвагаас гадна Санкт-Петербург, Екатеринбург, Уфа зэрэг хотуудад үүссэн байна.

Надеждин бас дайнаас зугтсан Оросын иргэдийн дэмжлэгийг авахаар төлөөлөгчийн газруудаа Армени, Гүрж, Серби, Израиль улсуудад нээжээ.

Алексей Навальный, Михайл Ходорковский, Максим Кац зэрэг сөрөг хүчний олон улс төрч Надеждинийг дэмжиж байгаагаа илэрхийлсэн юм.

Одоогийн ерөнхийлөгчийн бодлогыг зарчмын хувьд эсэргүүцэгч гэж өөрийгөө тодорхойлсон Надеждиний мөрийн хөтөлбөрт “бусад улс орнуудын эсрэг цэргийн хүч үндэслэлгүй хэрэглэхийг зогсоох, Өрнөдийн орнуудтай хамтран ажиллах” зэрэг төлөвлөгөө тусгагджээ.

Эрх баригчдын дарамтаас болгоомжлон нэрээ нууцалсан нэг иргэн дайныг зогсоох зорилго нь Надеждинийг дэмжих хамгийн гол шалтгаан болохыг хэлсэн байна.

“Түүнийг дэмжих хамгийн гол шалтгаан энэ. Төрийн суртал нэвтрүүлэг өнөөдөр Орос оронд бүх зүйл сайн сайхан байгаа гэдэг ч энд хэдэн хүн цугларсныг хар” гэж тэр ярьжээ.

Баруун хойд Оросын Вологда мужаас Надеждинийг дэмжихээр Москвад ирсэн Александр “Би 24 настай ч Путин, Медведев хоёроос өөр хэнийг ч харсангүй. Би өөрчлөлтийг хүсэж байна” гэж ярьсан байна.

Одоогоор 300,000 хүний гарын үсэг цуглуулсан ерөнхийлөгч Путин гуравдугаар сард болох сонгуульд өрсөлдөх эрхээ аваад байгаа. Тэрбээр энэ удаа бие даан нэрээ дэвшүүлж байна.

Оросын хуулиар парламентад суудалтай намын нэр дэвшигчид дэмжигчдийн гарын үсэг цуглуулах шаардлагагүй байдаг юм. Энэ журмын дагуу Либерал Ардчилсан Намын Леонид Слуцкий, Шинэ Ардын Намын Владислав Даванков, Коммунист Намын Николай Харитонов нар сонгуульд өрсөлдөх эрхээ авчээ.

Хэдийгээр Надеждинийг олон хүн дэмжиж байгаа ч Оросын сонгуулийн төв хороо түүнийг ямар нэг шалтгаанаар нэр дэвшүүлэхээс татгалзах магадлалтай юм.

Эх сурвалж: The Moscow Times