Өмнөговь аймгийн нэрийн хуудас болсон “Түмэн тэмээний баяр” урлаг спортын наадам ирэх сарын 5-7-ны өдрүүдэд зохион байгуулагдахаар болжээ. Өвлийн аялал жуулчлалыг хөгжүүлэх зорилготойгоор 22 жилийн өмнөөс зохион байгуулсан уг наадам өмнө нь тус аймгийн Булган суманд болдог байсан бол энэ жил илүү өргөн хүрээг хамруулах зорилгоор аймгийн төвд хийх юм байна.  

“Түмэн тэмээний баяр 2022” наадмын үеэр тэмээн поло, тэмээтэй буухиа уралдаан, гоё тэмээтэй сайхан хос, тайлаг тэмээний бооцоотой уралдаан болно. Мөн атан тэмээ болон хоёр наст хурдан тэмээ уралдах аж. Өмнөговь аймгийн хэмжээнд коронавируст халдварын тохиолдол буурч, аймгийн хэмжээнд урлаг соёл, спортын үйл ажиллагааг халдвар хамгааллын дэглэмийг барин зохион байгуулахыг аймаг, сумын Онцгой комиссоос зөвшөөрөөд байгаа юм.