Нийслэлийн автозамын түгжрэлийг бууруулах зорилтын хүрээнд зарим ЕБС-ийн хичээл эхлэх цагийг өөрчилж, зөрүүлэх асуудлаар олон нийтээс санал авч байгаа билээ. Тэгвэл санал асуулгад оролцсон иргэдийн 69.9 хувь нь хуваарь өөрчлөлт оруулахыг дэмжсэн санал өгчээ. Тодруулбал, одоогийн байдлаар 4379 хүн санал өгсний  3059 нь хичээл эхлэх цаг болон дээрх зохицуулалттай уялдуулан аж ахуйн нэгж, байгууллагын ажил эхлэх, тарах цагийг уян хатан болгохыг дэмжсэн байна. 

Санал асуулга өчигдөр эхэлсэн бөгөөд 2022 оны хоёрдугаар сарын 18-ны 14:00 цаг хүртэл үргэлжилнэ. Олонх нь дэмжвэл түгжрэлд нөлөөлдөг 59 сургуулийн хичээл эхлэх цагт өөрчлөлт оруулах юм.

Эдгээр 59 сургуулийн 44 нь Их тойрууд байршилтай бол 15 нь Хан-Уул дүүрэг буюу Яармагт байрладаг. Дээрх сургуулиудад нийт 85.207 хүүхэд суралцаж байгаагаас 23.952 буюу 28.1 хувь нь такси болон хувийн унаагаар хичээлдээ явдаг гэсэн судалгаа гарчээ.