Умард Африкийн Алжир улсын Оран хотоос Францын нийслэл Парис хотод ирсэн зорчигч тээврийн нисэх онгоцны дугуйн тасалгаанаас ноцтой хэмжээнд осгосон хүн олдсон тухай Францын эрх баригчид өчигдөр мэдээлжээ.

Орли нисэх буудалд газардсан Air Algerie компанийн нисэх онгоцонд техникийн үзлэг явуулах үеэр 20 гаруй насны эрэгтэйг олсон байна.

Ямар ч бичиг баримтгүй түүнийг яаралтай эмнэлэгт хүргэжээ.

“Тухайн хүн амьд байгаа ч хүчтэй осголтын улмаас биеийн байдал нь маш хүнд байна” гэж нисэх буудлын албаны эх сурвалж мэдээлсэн юм.

Зорчигч тээврийн онгоц 10,000 орчим метрийн өндөрт нисдэг тул гадна талд нь агаарын температур Цельсийн -50 хэм хүртэл унаж, хүчилтөрөгчийн хэмжээ эрс багасдаг.

Ийм нөхцөлд онгоцыг газардуулагч дугуйн тасалгаанд байсан хүн амьд үлдэх боломж маш бага юм.

АНУ-ын Холбооны Нислэгийн Захиргааны мэдээллээр бол 1947-2021 оны хооронд 132 хүн ийм аргаар зорчсон тохиолдол бүртгэгдэж байжээ. Эдгээрийн 77 хувь нь амиа алдсан байна.

2019 оны долдугаар сард Лондон хотын захын цэцэрлэгт хүрээлэнд эрэгтэй хүний хөлдсөн цогцос тэнгэрээс унаж байв.

Үүнийг тухайн үед Хитроу нисэх буудалд газардах гэж байсан Кени улсын Kenya Airways компанийн онгоцноос унасан гэж үзэж байжээ.

Эх сурвалж: AFP