Урт цагаан барилгыг нураах санал асуулгатай холбоотой асуудлаар архитектур, хот төлөвлөлтийн чиглэлээр үйл ажиллагаа явуулж буй Хот төлөвлөгчдийн нэгдсэн холбоо, Урбан иргэдийн форум, Хүрээ архитекторууд ТББ, Антитезиз ателье зэрэг төрийн бус байгууллагууд, судлаачид нэгдэж Нийслэлийн Засаг дарга бөгөөд Улаанбаатар хотын захирагч Х.Нямбаатарт албан шаардлага хүргүүлж байгаа талаараа мэдээлэл хийлээ. 

Ц.Уянга "Хотын төв буюу бага тойрууд Улаанбаатар хотын анхны архитектурын төлөвлөлт гарч байсан түүхтэй. Улаанбаатар хот үүссэн түүхийг арчиж хаях гэж байгаа нь хамгийн том аюул.

Нэгэнт иргэдийн дунд санал асуулга явуулах гэж байгаа бол хэлбэр төдий биш мэргэжлийн хүмүүсийн санал асуулгыг оролцуулдаг бусад өөр хувилбаруудыг гаргаж өгөхийг шаардаж байна. Урт цагааны гудамжийг үндсэн төлөвлөлт, агуулгаар нь хөгжүүлэн сэргээн засаж, анхнаасаа явсан жуулчны гудамж гэдгийг нь хадгалсан төлөвлөлтийг гаргах ёстой" гэв. 

"Монгол Улсын барилгын салбарт гавьяатай нэгэн болох Б.Дамбийнням гуайн гол сор бүтээлүүдийн нэг нь Урт цагааны барилга"

Урт цагааны барилга нь яагаад үнэ цэнтэй талаар архитектурч Б.Батзориг "Урт цагааны барилгын архитектурч нь Монгол Улсын барилгын салбарт гавьяатай нэгэн болох Б.Дамбийнням юм. Түүний энэ хотыг байгуулахын тулд өөрийн ур мэдлэгээ дайчилж ажиллаж байсан цаг хугацааг өнөөдөр үгүйсгэж байна. Энэ хүний хийсэн нэлээд олон бүтээлүүдээс гол соруудын нэг нь Урт цагааны барилга юм. Барилгын салбар үүсэж хөгжсөнөөс хойш Урт цагаан гэдэг барилга барилгыг яаж барих урлаг, технологийг яаж ашиглах талаар сургаж ирсэн. Иймд гавьяат барилгачдынхаа хийсэн бүтээлүүдийг хамгаалж, үр хойчдоо өвлүүлэх бодлогыг илүү гаргадаг байгаасай гэж хүсэж байна" гэлээ.  

"Улаанбаатарын түүхэн төвд хотын уран барилга, төлөвлөлт, цогц байдлыг эвдсэн янз бүрийн объектуудыг барьж эхэлсэн" 

Ц.Дэмбэрэл "Өнөөдөр бид Улаанбаатар хотын түүхийн төгсгөлийн хэцүү цаг үеийг туулж байна. Бидний нүдэн дээр Улаанбаатар хотын ой санамжийг устгаж байна. Энэ үйл явц нэлээд олон жил үргэлжиллээ. Улаанбаатар хотын ерөнхий дүр төрх кино, ном зохиол, хүмүүсийн толгойд үлдэх байх. Гэхдээ эдгээрээс хамгийн бодитой нь барилгууд юм.

2000 он гарснаас хойш Улаанбаатар хотын түүхэн төв гэж нэрлээд байгаа хааш хаашаагаа 500-хан метр энэ орон зайд хотын уран барилга, төлөвлөлт, цогц байдлыг эвдсэн янз бүрийн объектуудыг нэг нэгээр барьж эхэлсэн. Нэг мэдэхэд л бид Улаанбаатар хотын түүхэн төвийг алдаж байна. Энэ барилгын эзэн нь Улаанбаатар хотын өмчийн харилцааны газар. Хувийнх нь өмч байсан бол тордоод, тоос ч хүргэхгүй үлээгээд зогсох байх. Энэ хүмүүсээс хариуцлага нэхэх хэрэгтэй. Нийтийн өмчийг тордолгүй ийм болтол нь явуулчхаад одоо муу муухайгаар нь дуудаж энэ барилгыг гутааж байгаа нь буруу" гэв.