Ипотекийн 8%-ийг 6% руу шилжүүлэх зорилгоор байгуулагдсан иргэдийн түр хорооноос өнөөдөр мэдээлэл хийлээ.

Түр хорооны төлөөлөл хэлэхдээ “Нийгэмд эрх тэгш байдал алдагдсан. Зарим хүн зургаан хувиар ипотекийн зээл төлж байхад хэсэг бүлэг хүн найман хувиар төлж байна. 200 гаруй мянган иргэний эрх ашиг хөндөгдөж байгаа.

D-Parliament системд “Ипотекийн найман хувийн зээлийг зургаан хувьд шилжүүлэх” хуулийн төсөл санаачлах санал гарсан. Өнөөдрийн байдлаар 18,450 хүн гарын үсгээ зурсан байна.100 мянган хүний гарын үсэг цуглуулчихвал УИХ-аар орох боломж бүрдэнэ. Санал хүлээн авах хугацаа дуусахад 16 хоног л үлдсэн.

100 мянган хүний гарын үсэг цуглуулах нь хүнд тул бид өнөөдөр мэдээлэл хийж, ард иргэдээсээ D-Parliament-д санал өгөөч гэж гуйж байгаа юм. Энэ бидний хамгийн сүүлийн боломж юм. Түр хороо одоогоор найман хүнтэй байгаа, санал цуглуулахын төлөө бүх хүчээрээ явна" гэлээ. 

2012 онд ипотекийн 8%-ийн зээлээр орон сууц авсан иргэн “Орон сууцтай байх нь хүн бүрийн хэрэгцээ. Би тухайн үед 19 жилийн хугацаатайгаар ипотекийн 8 хувийн зээл авсан. Банкнаас тухайн үедээ 39 сая төгрөгийн зээл авсан. Зээлээ төлж дуусахад 38,648,000 төгрөгийг хүүгийн төлбөрт төлөх бөгөөд бүтэн нугалж төлж байгаа.

Бид зургаан хувийн зээл авсан иргэдтэй барьцаагүй. Эдийн засаг хүнд, мөн хувьсан өөрчлөгдөж буй цаг хугацааны эрхээр дуугарах шаардлага үүсдэг юм байна. Монголчуудыг D-Parliament цахим системд санал асуулгад идэвхтэй оролцохыг хүсэж байна” гэв.