Гаалийн Ерөнхий Газар(ГЕГ)-аас 2023 оны эхний 10 сарын байдлаар илрүүлэн зөрчил, авсан арга хэмжээний талаарх мэдээллээ өнөөдөр танилцуулав.

ГЕГ-ын Зөрчилтэй тэмцэх, аюулгүй байдлын газрын дарга Ж.Эрдэнэболд "Гаалийн байгууллага Монгол Улсын хилээр нэвтрүүлэхийг хориглосон болон хязгаарласан барааны хууль бус эргэлт, гаалийн хэрэг зөрчилтэй тэмцэх ажлын хүрээнд энэ оны эхний 10 сарын байдлаар нийт 1,578 зөрчил илрүүллээ. Үүнээс 32 нь гэмт хэргийн шинжтэй үйлдэл байв. Иймд холбогдох хууль хяналтын байгууллагад шилжүүлсэн.

Монгол Улсын хилээр хууль бусаар эд зүйл нэвтрүүлэхийг завдсан хэрэг зөрчлөөс танилцуулбал

• 17 удаагийн үйлдлээр таван нэр төрлийн 2,630 хүн тун мансууруулах эм, сэтгэцэд нөлөөлөх бодисыг хууль бусаар нэвтрүүлэхийг завдсаныг илрүүлж, таслан зогсоосон
• хоёр удаагийн үйлдлээр нийт 4,591 грамм буюу 4.6 килограмм алтан гулдмайг Монгол Улсын хилээр хууль бусаар гаргах гэж байсныг таслан зогсоосон
• зургаан удаагийн үйлдлээр түүх соёлын өв, дурсгалт зүйлийг улсын хилээр гаргах гэж байсныг илрүүлэн, таслан зогсоосон
• нэг удаагийн үйлдлээр 375 килограмм химийн бодисыг гаальд мэдүүлэхгүйгээр хууль бусаар улсын хилээр нэвтрүүлэх гэж байсныг тус тус гаалийн хяналт шалгалтын явцад болон холбогдох хууль сахиулах байгууллагууд буюу цагдаа, хил хамгаалах байгууллагуудтай хамтран илрүүлэн шалгаж ажиллаж байна" хэмээв.

Манай улс ОХУ-тай хил залгаа 10 боомт, БНХАУ-тай хил залгаа 13 боомт, агаарын нэг боомт буюу нийт 24 боомт болон 160 орчим гаалийн хяналтын бүсэд 1,700 орчим хяналтын камерыг байнгын ажиллуулж, теле-хяналтын нэгдсэн системээр гаалийн болон бусад зөрчлөөс сэргийлэх, илрүүлэх, таслан зогсоох чиглэлээр ажилладаг байна.