Ч.Г нь “Н” ХХК-д борлуулалтын менежерээр ажиллаж байхдаа албан тушаалын байдлаа ашиглаж “М” брэндийн сандлын борлуулалтын орлогоос 32,9 сая төгрөгийг завшсан буюу их хэмжээний хохирол учруулсан гэмт хэрэгт холбогдож Прокуророос Эрүүгийн хуулийн тусгай ангийн 17.4. Эд хөрөнгө завших зүйл ангиар зүйлчлэн яллах дүгнэлт үйлдэн шүүхэд шилжүүлсэн.

БЗ, СБ, ЧД-н Эрүүгийн хэргийн анхан шатны тойргийн шүүх хэргийг 2025 оны 08 сарын 18-ны өдөр хэргийг хэлэлцээд: Шүүгдэгч Ч.Г-г бусдын итгэмжлэн хариуцуулсан эд хөрөнгийг албан тушаалын байдлаа ашиглаж завшсан гэмт хэрэг үйлдсэн гэм буруутайд тооцож 40.000 нэгжтэй тэнцэх хэмжээний буюу 40 сая төгрөгөөр торгох ял оногдуулж шийдвэрлэснийг Нийслэлийн Эрүүгийн хэргийн давж заалдах шатны шүүх 2025 оны 11 дүгээр сарын 13-ны өдөр хэргийг хэлэлцээд шийтгэх тогтоолыг хэвээр үлдээж шийдвэрлэсэн.

Хяналтын шатны шүүх: Хэрэгт харилцан зөрүүтэй нотлох баримтууд авагдсан шүүхүүд хэрхэн үнэлсэн талаар тодорхой заагаагүй, хоорондоо зөрүүтэй нотлох баримтаар хэн нэгний гэм бурууг хөтөлбөргүй нотлох боломжгүй гэх агуулгатай дүгнэлтийг хийж анхан болон давж заалдах шатны шүүхийн шийтгэх тогтоол, магадлалыг хүчингүй болгож шүүгдэгч Ч.Г-д холбогдох хэргийг хэрэгсэхгүй болгон түүнийг цагаатгаж шийдвэрлэлээ.