Н.Наранбаяр Гашуунсухайт дахь гаалийн газар гаалийн улсын байцаагчаар ажиллаж байхдаа Авлигын эсрэг хууль, Төрийн албаны тухай хууль, Гаалийн тухай хуулийг зөрчиж албаны үүргээ хэрэгжүүлэхгүйгээр Б ХХК, Х ХХК-ийн мэдүүлсэн 2022 оны 09-р сарын 20-ны өдрийн 4 чингэлэг ачаа бараанд хяналт шалгалт хийлгүйгээр Монгол Улсын хилээр нэвтрүүлж, гаалийн татварт 50 сая төгрөгийг төлүүлэхгүйгээр бусдад давуу байдал бий болгосон нь мөрдөн шалгах ажиллагааны явцад тогтоогдож прокуророос яллах дүгнэлт үйлдэн хэргийг шүүхэд Шилжүүлжээ.

Анхан шатны шүүх: Шүүгдэгч Н.Наранбаярыг Эрүүгийн хуулийн тусгай ангийн 23.5 дугаар зүйлийн 1 дэх хэсэгт заасан Албан тушаалтан хууль, захиргааны хэм хэмжээний актаар тодорхойлогдсон албан үүргээ биелүүлээгүй, зохих ёсоор биелүүлээгүйн улмаас бусдад их хэмжээний хохирол учирсан гэмт хэрэг үйлдсэн гэм буруутайд тооцож нийтийн албанд томилогдох эрхийг 2 жилийн хугацаагаар хасаж, 3000 нэгжтэй тэнцэх буюу 3 сая төгрөгөөр торгох ял оногдуулж, иргэний хариуцагч Б ХХК, Х ХХК-с тус тус 23,9 сая төгрөгийг гаргуулж улсын орлогод оруулахаар шийдвэрлэлээ.