ШУТИС-ийн лицей сургуулийн нэр бүхий багш сурагчдаа харааж загнадаг, сурах эрхийг нь зөрчдөг талаар сурагчид гомдол гаргаж сургуулийн захиргаандаа өргөдөл бичгээр хүсэлт гаргажээ. Сурагчдын гомдолтой зэрэгцэн 15 багш ажилтан мөн тухайн багшийн ёс зүй, харилцаа хандлага, хэл үгээр доромжилдог байдлыг тэвчиж чадахгүйд хүрсэн учраас ажлаа өгөхөөр нэгдэж, мөн л өргөдөл гаргажээ. Хамгийн хачирхалтай нь сурагчдын ч, багш ажилчдын ч өргөдөл шийдэгдэхгүй байгаа учраас хэвлэл мэдээллийн хэрэгсэлд хандахад хүрчээ. Нэр бүхий энэ багш эмэгтэй ШИТИС-ийн лицей сургуульд цөөнгүй жил багшилж байгаа бөгөөд өмнөх удирдлагуудыг ажлаа өгөхөд хүргэж байсан гэнэ. Харин сурагчдыг хичээлийг цагаар өөлж гоочлон ярьж, гаднах төрхөөр нь онцлон ичээж мөн та нар архичин юмчинь ойлгодог зүйлээр чинь жишээ авья хэмээн архины грамм нэрлэж суудаг гэнэ. Өсвөр насны хүүхдүүд энэ багшийг сольж өгөөч гэсэн өргөдөл дээрээ бүгд өөр өөр кэйс дурьджээ. Уг асуудлыг хөндөж нийтэд мэдээлье гэхэд ч сурагчид айдастай байв. Мөн лицей сургуулийн ажилчид ч тухайн багштай хамтран ажиллахад бэрхшээлтэй байдаг бөгөөд ажлаас гарахаар 16 хүний гарын үсэг цуглаад байгаа гэнэ.  

Тухайн багш анх тус сургуулийн захирлын туслах  байсан гэж ажилтнууд ярьж байна. Улмаар мэдээллийн технологийн багш болсон гэнэ. ШУТИС-ийн лицей сургууль нь өөрийн гэсэн байргүй, оюутнуудтай нэг байранд хичээллэдэг. Эцэг эхчүүдийн зүгээс зориулалтын бус байранд насанд хүрсэн хүмүүстэй хамт хичээллэж байгаад хүүхдүүддээ санаа зовохын зэрэгцээ багшийн ёс зүйгүй хариуцлагагүй бүдүүлэг хандлага ааш авираас хүүхдийнхээ бие махбодь сэтгэлзүйг хамгаалах давхар үүрэг хүлээн амьдарч байна.