Лхагва гарагт үнэт металлын үнэ огцом өсөж, унц нь 5400 ам.доллар давлаа. Улаанбаатарын цагаар өнөө өглөө 06 цагт Нью-Йоркийн Comex таваарын биржид болсон арилжаагаар алтны үнэ 5411 ам. долларт хүрсэн байна. Өмнөх өдөр нь үнэт металлын ханш 5200 ам.доллартой дүйж байсан юм.

Үүний зэрэгцээ мөнгөний үнэ 3.3 хувиар өсөж 116.69 ам.доллар, цагаан алт 2.5 хувиар нэмэгдэн 2707.67 ам.доллар болжээ.  

Холбооны нөөцийн сан хүүг тогтвортой барих шийдвэр гаргасан ч хөрөнгө оруулагчид үнэт металлыг үргэлжлүүлэн худалдаж авсаар байгаа нь ханш өсөлтөд нөлөөлж буй аж. 

“Энэхүү өсөлт нь Төв банкуудын тогтвортой худалдан авалт, чиг хандлагыг дагадаг хөрөнгө оруулалтын сангуудын тасралтгүй эрч, мөн чанартай актив руу чиглэсэн хүчтэй урсгалаар тэжээгдэж байна” гэж IG компанийн зах зээлийн шинжээч Тони Сикамор хэллээ.