Нийгмийн даатгалын ерөнхий газрын даргын зөвлөлийн хурлаар Капитал банк ХХК дахь БЭХА, Чингис хаан банкнаас нэхэмжилсэн төлбөрийн барагдуулалт, Нийгмийн даатгалын сангийн авлагад өр төлбөр хүлээн авах тухай, Нийгмийн даатгалын улсын байцаагчийн шалгалтын дүн, “Дэлгэрэнгүй хууль” НҮТББ-ийн хийж гүйцэтгэсэн ажлын танилцуулга зэрэг  асуудлыг хэлэлцлээ.

Өнөөдрийн байдлаар Капитал банк ХХК дахь БЭХА болон Чингис хаан банкны нийгмийн даатгалын санд төлөх нийт өр төлбөр 207.7 тэрбум төгрөгөөс нийт 58.6 тэрбум төгрөгийг барагдуулсны 33.7 тэрбум төгрөгийг үл хөдлөх хөрөнгөөр, мөнгөн хөрөнгөөр 24.9 тэрбум төгрөгөөр барагдуулж, нийт үлдэгдэл 149.1 тэрбум төгрөг байна. Үүнээс 2025 онд 4.1 тэрбум төгрөгийг мөнгөн хөрөнгөөр, 8.7 тэрбум төгрөгийг үл хөдлөх хөрөнгөөр, нийт 12.8 тэрбум төгрөгийг барагдуулаад байна. Цаашид хоёр банкны өр төлбөрийг барагдуулах ажлыг эрчимжүүлж, нийгмийн даатгалын сангийн авлагад үл хөдлөх хөрөнгийг тооцон авах асуудлыг шийдвэрлэж, тухайн саналыг Нийгмийн даатгалын үндэсний зөвлөлд уламжлан хэлэлцүүлэхээр шийдвэрлэлээ. Мөн төлбөр барагдуулах чиглэлээр хамтран ажиллаж буй “Дэлгэрэнгүй хууль” НҮТББ-ийн гүйцэтгэж байгаа ажлын явц, үр дүнг сонслоо.

Нийгмийн даатгалын ерөнхий хуульд заасны дагуу жил бүр нийгмйн даатгалын Улсын байцаагчийн эрх олгох, баталгаажуулах шалгалтыг зохион байгуулдаг. Энэ жил тус шалгалтыг 2025 оны 12 дугаар сарын 06-11-ний өдрүүдэд нийслэл, орон нутгуудад нь зохион байгуулж, 411 албан хаагч оролцлоо. Албан хаагч нийгмийн даатгалын Улсын байцаагчийн эрхээ баталгаажуулснаар мэргэжилдээ мэргэшиж иргэд даатгуулагч, ажил олгогч, харилцагчдад нийгмийн даатгалын үйлчилгээг түргэн шуурхай, чирэгдэлгүй хүргэх боломж бүрдэх юм. Ирэх жилийн улсын байцаагчийн шалгалтыг 2026 оны нэгдүгээр улиралд зохион байгуулахаар төлөвлөөд байна.