Монголбанк бодлогын хүүгээ 12 хувьд хэвээр үлдээхээр шийдвэрлэснээ зарлалаа. Ингэснээр төв банкны мөнгөний бодлогын хороо өнгөрсөн гуравдугаар сард бодлогын хүүгээ 2 нэгж хувиар огцом нэмэгдүүлснээс хойш таван удаа дараалан хэвээр хадгалж байна. Одоогийн нөхцөлд бодлогын хүүг өөрчлөх шаардлага үүсээгүй гэж Монголбанк үзжээ. Лхагва гарагт Үндэсний Статистикийн Хороо 11 дүгээр сард улсын хэмжээнд инфляц 8.2 хувьтай гарч, өмнөх оны мөн үеэс нэг орчим нэгж хувиар өндөр түвшинд хадгалагдсаныг мэдээлсэн юм. Өнгөрсөн онд Төрийн зохицуулалттай үйлчилгээний үнэ нэмэгдсэн нь инфляц өндөр түвшинд хадгалагдах гол шалтгааны нэг болж байна.