Хятадын тоглоом, цуглуулгын зах зээлд тэргүүлэгч "Pop Mart" компанийн зах зээлийн үнэлгээ 43 тэрбум ам.долларт хүрч, шинэ дээд амжилт тогтоолоо. Тус компанийн нэрийн бүтээгдэхүүн болох Labubu зэрэг “blind box” тоглоом дэлхий даяар эрэлттэй болж, ийн үнэлгээгээ богино хугацаанд огцом өсгөсөн байна.

"Pop Mart"-ийн борлуулалт 2025 оны байдлаар өмнөх жилээс 165 хувиар өссөн бол гадаад зах зээл дэх орлого нь 475 хувиар нэмэгджээ. Ялангуяа АНУ, Европ, Австрали зэрэг орнуудад pop-up дэлгүүрүүд нээгдэж, шинэ зах зээлээ тэлж байгаа нь компанийн өсөлтийн гол түлхүүр болж байна.

Гэхдээ Хятадын эрх баригчид “blind box” тоглоомыг хүүхдүүдийг донтох эрсдэлтэй хэмээн үзэж, хяналтыг чангатгах талаар мэдэгдсэн нь Pop Mart-ийн хувьцааны ханшийг богино хугацаанд 6 хувиар унагаад байгаа юм. Шинжээчдийн үзэж буйгаар зохицуулалтын энэ өөрчлөлт компани болон салбарын ирээдүйд тодорхойгүй байдал үүсгэж болзошгүй ч, Pop Mart гадаад зах зээлдээ тулгуурлан өсөлтөө үргэлжлүүлэх төлөвтэй байна.

Өнөөдрийн байдлаар Pop Mart-ын зах зээлийн үнэлгээ Mattel, Hasbro зэрэг дэлхийн тоглоомын аваргуудаас даваад байгаа бөгөөд JPMorgan зэрэг хөрөнгө оруулагчид үнэлгээг өсөх боломжтой хэмээн онцолж, ирэх саруудад илүү өндөр дүн үзүүлж болзошгүйг мэдэгдсэн байна.