2025 он гарсаар Оросын рубль дэлхий дахинд хамгийн их амжилт гаргасан валют болж, эдийн засгийн шинжээчдийн анхаарлыг татаж байна.

Bank of America-ийн мэдээлснээр, рубль ам.долларын эсрэг 40 гаруй хувиар өсч, дэлхийн зах зээл дээр хамгийн өндөр өгөөжтэй валютын тоонд багтжээ.

Мэргэжилтнүүдийн үзэж байгаагаар энэхүү өсөлтөд хэд хэдэн хүчин зүйлс гол нөлөө үзүүлсэн байна. Оросын Төв банкны зүгээс өндөр хүүгийн бодлого баримтлан, зээлийн хүүг 20-21 хувь болгосон нь рублийг гадаадын хөрөнгө оруулагчдад ашигтай, тогтвортой валют болгожээ. Түүнчлэн, капиталын хяналтыг чангатгаж, валютын гүйлгээг хязгаарласнаар рублийн эрэлт нэмэгдсэн байна.

Дээрээс нь, дэлхий дахинд АНУ-ын долларын ханш сул байгаа нь рублийн бэхэжлийг дэмжсэн хүчин зүйл болжээ. Гэсэн ч зарим шинжээчид рублийн энэхүү огцом өсөлт нь богино хугацааны үр дүн байх магадлалтайг анхааруулж байна. Учир нь экспортын орлого буурах, дотоодын инфляц хурдасах зэрэг эрсдэлүүд хүлээгдэж байгаа юм.