Өчигдөр буюу 2025 оны тавдугаар сарын 20-ны өдөр Дэлхийн зах зээлд нүүрсний үнэ дахин сэргэж, тонн тутамд 100 ам.долларт хүрлээ.

Өнгөрсөн сард нүүрсний үнэ 94.25 ам.долларт хүрч, сүүлийн хэдэн жилийн хамгийн доод түвшинд байсан бол энэ сарын байдлаар үнэ өсөж эхэлсэн байна. Хятадын нүүрсний импорт буурсан, мөн дэлхийн зах зээлд нийлүүлэлт ихэссэн зэрэг хүчин зүйлс өнгөрсөн сард үнийн уналтад нөлөөлсөн хэдий ч, сүүлийн саруудад эрэлт эргэн сэргэсэн нь үнийг өсгөхөд түлхэц болжээ.

Шинжээчид нүүрсний үнэ богино хугацаанд 100 ам.доллар орчим түвшинд тогтворжиж, тодорхой хэмжээгээр өсөх магадлалтай хэмээн таамаглаж байна. Энэ нь Монголын нүүрсний экспортод эерэг нөлөө үзүүлж, эрчим хүчний салбарт ашиг орлого нэмэгдэх боломжтой гэж үзэж байгаа аж. 

Улс орнуудын эрчим хүчний эрэлт хэрэгцээ нэмэгдэж буй өнөөгийн нөхцөлд нүүрсний үнэ цаашид хэрхэн өөрчлөгдөх нь дэлхийн зах зээлийн хамаарлаас шалтгаалах бөгөөд хятад болон бусад томоохон импортлогчдын бодлого, дотоод үйлдвэрлэл нөлөөлөх төлөвтэй байна.