Нийтийн өргөдлийн цахим системд иргэн Э.Батбаяр "Улаанбаатар хотын тээврийн хэрэгсэлийн татварын нэмэгдэлийг цуцлах" ажлын хэсэг байгуулах өргөдөл гаргасан. Уг өргөдлийг 33 мянган дэмжиж гарын үсэг зурснаар ажлын хэсэг байгуулагдана. Гуравдугаар сарын 17-нд санаачилсан уг өргөдлийг өнөөдрийн байдлаар 20072 иргэн дэмжжээ. Тус өргөдөлд "Улаанбаатар хотын тээврийн хэрэгсэлийн татварын нэмэгдэлийг цуцлахыг шаардаж байна.Ард түмний амьдрал хэцүү энэ үед тээврийн хэрэгсэлийн татвар зам ашигласаны татварыг огцом хэд дахин нэмсэн нь маш буруу шийдвэр юм. Энэ шийдвэрээ цуцлахыг хүсэж байна" гэжээ. 

Иргэн та дэмжиж санал өгөхийг хүсвэл https://petition.parliament.mn/Detail?id=fba11543-66c9-42c9-ae89-3f280f762219&fbclid=IwY2xjawJXAcRleHRuA2FlbQIxMAABHfJX9-3oEjvBOMYiFxU7VgR1xdy09eTPYwVI27NCy5lPZq-liS-pllaIAw_aem_Owaw07bYyqHYPxnubs_uEg энэ холбоосоор нэвтрээрэй. 

Нэмж танилцуулахад, 

Монгол Улсын 18 насанд хүрсэн иргэн D-Өргөдөл буюу “Нийтийн цахим өргөдөл, гомдлын систем”-д “ДАН” системээр эсвэл цахим гарын үсгээр баталгаажуулан нэвтэрнэ. Иргэн тус системээр дамжуулан тодорхой асуудлаар ажлын хэсэг байгуулах; Байнгын хорооны эрхлэх асуудлын хүрээнд хяналт шалгалт явуулах; хуулийн төслийн талаар санал гаргаж болно. Түүнчлэн тодорхой өргөдөл санал дээр зөвхөн нэг удаа санал өгөх боломжтой.

Тус систем дээр иргэний гаргасан санал “Цахим систем ашиглан иргэдийн оролцоог хангах, санал авах журам”-ын 3.4-т заасны дагуу сэдэв бичих; үндэслэл, тайлбар бичих; ёс бус үг хэллэг хэрэглэхгүй байх шаардлагыг хангаж, 100 иргэний дэмжлэг авсан тохиолдолд хоёр дахь шатны санал авах үйл ажиллагааг явуулах юм. Тодруулбал, тухайн саналыг 30 хоногийн хугацаатай цахим системд нээлттэй байршуулна. Ажлын хэсэг байгуулах иргэний саналыг 33,000 ба түүнээс дээш тооны иргэн дэмжсэн бол; Байнгын хорооны эрхлэх асуудлын хүрээнд хяналт шалгалт явуулах саналыг 70,000 ба түүнээс дээш тооны иргэн дэмжсэн бол; хуулийн төслийн талаарх саналыг 100,000 ба түүнээс дээш тооны иргэн дэмжсэн бол санал авах үйл ажиллагааг хугацаанаас өмнө дуусгавар болгож болно.

Санал авах үйл ажиллагааны техник, зохион байгуулалтыг Улсын Их Хурлын Тамгын газар хариуцан ажиллах бөгөөд санал авах үйл ажиллагааны үр дүнг ажлын 3 хоногт багтаан Улсын Их Хурлын даргад хүргүүлнэ.

Шаардлага хангасан саналыг ээлжит чуулганы үеэр 14 хоногийн дотор, ээлжит чуулганы чөлөө цагт ээлжит болон ээлжит бус чуулган эхэлснээс хойш 10 хоногийн дотор харъяалах Байнгын хороо хэлэлцэж, холбогдох шийдвэрийг гаргана. Харин хуулийн төслийн талаарх саналыг 100,000 ба түүнээс дээш тооны иргэн дэмжсэн бол Улсын Их Хурлын дарга уг асуудлаар Улсын Их Хурлын чуулганы нэгдсэн хуралдаанд мэдээлж, харъяалах Байнгын хороонд шилжүүлнэ.