2025 онд орон сууцны ипотекийн зээлийн зориулалтаар 1.2 их наяд төгрөгийг улсын төсөвт тусгажээ. Харин зээлийг олгохдоо иргэний сонгосон орон сууцны талбайн хэмжээнээс хамаарч хүүгийн шаталсан хувилбарыг хэрэгжүүлэхээр Хот байгуулалт, барилга, орон сууцны яамнаас төлөвлөн ажиллаж байна.

Монгол банкны судалгаагаар нийт зээл авсан иргэдийн нийтлэг сонгосон байрны талбайн хэмжээ 50-60 м.кв байгаа учраас зээлдэгчийн орлогын эх үүсвэрээс хамаарч тухайн өөрчлөлтийг оруулахаар болжээ. Түүнчлэн Дэлхийн банк хийсэн судалгаа, зөвлөмжийнхөө дагуу орон сууцны талбай бага тусам хүү нь бага, талбайн хэмжээ том байх тусам хүү нь өндөр байхаар зохицуулалтыг санал болгосон байна. Уг саналыг дотооддоо хэрэгжүүлэх чиглэлээр судалгаа хийсний үндсэн дээр  шийдвэр гаргах түвшинд хүрчээ.

Өнөөдрийн байдлаар ипотекийн зээлд хамрагдсан иргэдийн 50 хувь нь сарын орлого 2,5  сая төгрөг байгаа бол үлдсэн хувь нь дундажаас дээш орлоготой байна. Ипотекийн зээлд эхний ээлжид бага дундаж орлоготой иргэдийг зээлд түлхүү хамруулснаар агаар орчны бохирдол буурч, илүү тухтай амьдрах нөхцөл бүрдэнэ гэж үзэж байгаа юм. Тус журамд анх удаа байр авч байгаа дундаж болон түүнээс доош орлоготой иргэдэд хамрагдах бөгөөд 100 м.кв байр сонговол 10 хувийн хүү, 40 хүртэлх м.кв байр сонговол 4 хувь, 60 хүртэлх бол 6 хувь, 50 хүртэлх бол 5 хувийн хүү тооцох зарчмаар хөнгөлөттэй зээлийг өөрийн орлогод тохируулан авахаар болж байна.

Харин 2 дахь удаагаа уг зээлийг авах бол илүү өндөр хүүгээр хамрагдах аж.