Төрийн өндөр дээд албан тушаалтнуудын 2022 оны хөрөнгө орлогын мэдүүлгээс харахад Улсын Их Хурал (УИХ)-ын 13 гишүүний хөрөнгө нэг тэрбумаас дээш дүнгээр нэмэгджээ. 

Харин таван гишүүний хөрөнгө нэг тэрбумаас дээш дүнгээр буурсан байна. Нийт УИХ-ын гишүүдийн хөрөнгийн өсөлтийг нийлүүлэн тооцвол ойролцоогоор 40 тэрбум төгрөг болж байгаа юм. 

Хөрөнгө нь хамгийн их өссөн УИХ-ын гишүүн нь Ц.Мөнх-Оргил. Түүний хөрөнгө орлогыг 2021 оны мэдүүлэгтэй нь харьцуулбал 8.3 тэрбум төгрөгөөр нэмэгджээ. Мөн УИХ-ын гишүүн Ц.Цэрэнпунцагийн хөрөнгө 7 тэрбум, Д.Бат-Эрдэнийнх 5 тэрбум төгрөгөөр тус тус өсжээ. 

Тэгвэл хамгийн их дүнгээр хөрөнгө нь буурсан гишүүд нь Л.Энх-Амгалан, Ж.Ганбаатар, О.Цогтгэрэл нар байна. Тухайлбал УИХ-ын гишүүн, Боловсрол, шинжлэх ухааны сайд Л.Энх-Амгалан нэг жилийн дотор 9.3 тэрбум төгрөгийн хөрөнгөө "алдсан" байна.