20 орчим жилийн өмнө Тайландаас Шри-Ланка улсад бэлэглэж байсан заан Ням гарагт эх орондоо буцаж иржээ.

Одоо 29 настай уг зааныг Тайландын засгийн газар 2001 онд Шри-Ланка улсад бэлэглэсэн юм.

Гэвч хүлээж авсан улс нь заантай зүй бусаар харьцаж, тамлан зовоож байгаа тухай мэдээлэл ил болсны дараа өнгөрсөн онд Тайландын тал өгсөн бэлгээ буцааж авахаар хөөцөлдөж эхэлжээ.

Дөрвөн тонн жинтэй зааныг Илюшин 76 ачааны нисэх онгоцоор тусгайлан зассан төмөр саванд тээвэрлэн авчирсан байна.

”Заан Чан Майд эсэн мэнд ирлээ. Тэр таван цагийн турш нисэхдээ ямар ч асуудалтай тулгараагүй, хэвийн байсан” гэж Тайландын байгаль орчны сайд Варавут Силпа-арча нисэх буудлаас мэдэгджээ.

Зааныг тээвэрлэхэд Тайландын дөрөв, Шри-Ланкын нэг маллагч дагалдсан байна. Мөн тээвэрлэлтийн явцыг хоёр ширхэг камераар байнга хянаж байжээ.

Мал амьтны хорио цээрийн дэглэмийн дагуу зааныг эхлээд хэсэг хугацаанд тусгаарлан ажигласны дараа дархан цаазат газарт тавих гэнэ.

Зааныг эх оронд нь тээвэрлэн авчрах зардал $700,000 болсныг Тайландын албаныхан мэдээлжээ.

Буддын шашны хийдэд олон жил хүнд нөхцөлд амьдарсан зааныг мод бэлтгэлийн ажилд боолчилж, зодож занчиж байсан нь тогтоогдсон байна. Тайландад ирсний дараа зүүн урд хөлийнх нь гэмтлийг эмчлэхээр болжээ.

Бэлгийн зааны асуудал Тайланд, Шри-Ланка улсуудын хооронд дипломат маргаан үүсгэсэн юм.

Тайландын тал зааныг буцааж өгөх шаардлага тавьсныг Шри-Ланкын байгаль орчны сайд Павитра Ванниарачи “хэтэрхий хатуу шаардлага” гэж шүүмжилж байжээ.

Шри-Ланкын ерөнхий сайд Динеш Гунавардена өнгөрсөн сард парламентад үг хэлэхдээ заантай холбоотой маргааны асуудлаар Тайландын хаанд өөрийн биеэр гомдол илэрхийлэхээ мэдэгдэж байв.

Тайландын засгийн газар энэ явдлаас хойш гадаад улс орнуудад заан илгээхээ зогсоохоор шийдвэрлэжээ. Мөн өмнө нь гаргасан заануудаа шалгах дипломат элч нарыг дэлхийн олон оронд илгээснийг Тайландын байгаль орчны сайд мэдээлсэн юм.

Эх сурвалж: Aljazeera