Мах, гурилын нөөцөд ШӨХТГ-аас шалгалт хийжээ. Энэ талаар өнөөдөр хэвлэлийн хурал зохион байгууллаа.

Шалгалтын талаар тус газрын дарга Н.Мандуул "Махны нөөцийн хомсдол үүсэхээс сэргийлж зохион байгуулдаг үйл ажиллагаа хэр үр дүнтэй байгааг шалгалаа.

Урьдчилсан байдлаар дүгнэлтүүдээ гаргасан, ойрын хугацаанд Засгийн газарт зөвлөмжөө хүргүүлнэ.

Мах, гурилын нөөц бүрдүүлэхээр өнгөрсөн онд 90 орчим тэрбум төгрөгийн хөнгөлөлттэй зээлийг олгосон байдаг. Гэтэл энэхүү нөөц бүрдүүлэх схем нь нийлүүлэлтийн хомсдолыг арилгах үндсэн зорилгодоо хүрч чадахгүй байна гэж дүгнэлээ. Үүнд хувийн хэвшлийн ААН-ийг буруутгахаас илүүтэйгээр төрөөс зохион байгуулж байгаа ажил болохгүй байна. Үр дүнгүй ажлуудыг одооноос цэгцлэх ёстой.

Тухайлбал махны нөөц бүрдүүлэх үйл ажиллагааны хувьд зохион байгуулалтын уялдаа холбоо сул. Яам, нийслэлийн байгууллагууд хоорондоо уялдаа муутай байна. Хөнгөлөлттэй зээлийг оройтож олгосноос махны нөөц хугацаандаа бүрдэж чадаагүй байна. Ингэснээр хаврын махны хомсдолоос сэргийлж чадаагүй байна.

Нөөцийн махны бүрдүүлэлт хийж буй үндсэн зорилго юу болохыг тодорхой болгох ёстой. Бидний зүгээс улирлын шинж чанартай, махны нөөцийн хомсдолоос сэргийлж, 2-3 сарын хугацааны нийлүүлэлтийг өсгөх зорилготой үйл ажиллагаа. Зорилтот бүлгийн иргэн рүү бус, нийт иргэд рүү чиглэсэн үйл байх ёстой гэж харж байна.

Өнгөрсөн жилүүдэд 12-15 мянган тонн мах нөөцөлдөг байсан байна. Энэ жил 7.7 мянган тонн мах нөөцөлсөн. Үүнээс 3.2 мянган тонн мах зах зээлд нийлүүлэгдсэн нь хомсдол үүсэх нөхцөл болсон нь харагдаж байна" хэмээн мэдээллээ.