Үндэсний их баяр наадмын өдрүүдэд замын хөдөлгөөнийг хэрхэн зохицуулах талаар Нийслэлийн замын хөдөлгөөн, хяналт зохицуулалт хариуцсан дэд дарга, хурандаа Б.Батболд мэдээлэл өглөө. 

Тэрбээр "Баяр наадмын өдрүүдэд 6,470 тээврийн хэрэгслийг зогсоолын талбайд байршуулахаар замын цагдаагийн байгууллагаас төлөвлөсөн. Үзэгчид, гаднын зочид төлөөлөгчид, хөдөлгөөнд оролцогчдын тээврийн хэрэгслийг дараах байршлуудад байрлуулна. Үүнд: 

"Ж" зогсоолд жуулчдын автобус, унааг байршуулна. Нарантуул ОУХТ болон "Мишээл экспо" төвийн зогсоолд нийтийн тээвэр байршуулан иргэдийг зөөхөөр төлөвлөсөн" гэв. 

Мөн Төв цэнгэлдэх хүрээлэнг зорьж ирэх иргэдэд зориулан нийт дөрвөн чиглэлээс нийтийн тээврийн богинын хөдөлгөөнийг эхлүүлж, сурын талбайн урд талын зогсоолд буулгах юм байна. Үүнд: 

1. Дүнжингарав худалдааны төв - Төв цэнгэлдэх хүрээлэн
2. Мишээл сити - Төв цэнгэлдэх хүрээлэн
3. Нарантуул ОУХТ - Төв цэнгэлдэх хүрээлэн
4. Вокзал/1,000 машины зогсоол/ - Төв цэнгэлдэх хүрээлэн

Харин хотын төвөөс Хүй долоон худаг руу хоёр чиглэлээс тодорхой цагуудад нийтийн тээврээр үйлчилнэ. 

• МУБИС-ийн баруун талын автобусны буудал - Хүй долоон худаг чиглэлд нийт тав
• Төв цэнгэлдэх хүрээлэн - Хүй долоон худаг чиглэлд нийт 10 автобус тус тус үйлчлэхээр болжээ. 

Үргэлжлүүлэн тэрбээр "Иргэд соёолон насны морьдын уралдааныг үзэх гэж Хүй долоон худгийг зорьдог. Энэ хүрээнд цагдаагийн байгууллагаас соёолон насны морьдыг барианд орохоос нэг цагийн өмнө хотын төвөөс Хүй долоон худаг явах замын хөдөлгөөнийг нэг чигийн урсгалд оруулдаг. Харин морьд барианд орсны дараа Хүй долоон худгаас хотын төв рүү урсах замын хөдөлгөөнийг нэг чигийн урсгалтай болгоно. Уг үйл ажиллагааг энэ жил дахин зохион байгуулна" хэмээн мэдээлэв. 

Эх сурвалж: Нийслэлийн мэдээ