УИХ-ын гишүүн Т.Доржханд, хуульч О.Батхүү, Гантулга  нар англи хэл болон малчдын даатгалын асуудлаар өнөөдөр хэвлэлийн бага хурал зохион байгууллаа.

Монголчууд олон жил хүлээсэн Боловсролын реформ, тэтгэврийн болон нийгмийн даатгалын багц хуулийн төсөл өнөөдөр УИХ-ын чуулганаар хэлэлцэгдэх гэж буйтай холбогдуулан ХҮН намын мэргэжилтнүүд судалгаан дээр үндэслэсэн мэдээллийг өгч, байр сууриа илэрхийлэхээр шийдсэнийг хурлын эхэнд хэлэв.

ХҮН намын ерөнхий нарийн бичгийн дарга Д.Гантулга "Тэтгэврийн реформ нийгмийн суурь өөрчлөлтүүдийн нэг. Ахмадууд одоо авч байгаа тэтгэвэр амьдралд хүрэлцэхгүй байгааг, тэтгэврийн зөрүүг арилгахыг тэтгэврийн шинэчлэлээс хүлээж байна.

25-тай залуу 60 настай тэтгэвэрт гараад ийм сайхан амьдарна гэж бодохгүй, өөр хүлээлттэй байна. Өөрөөр хэлбэл залуучуудын хувьд хуримтлалтай болохыг хүлээж байгаа бол идэр насныхан шударга тэтгэвэр, хуримтлалтай болохыг хүлээж байгаа. Энэ бол ХҮН намаас боловсруулж байгаа тэтгэврийн шинэчлэлд оруулах төлөвлөгөө. Үүнийг хийхийн тулд төрөөс тэтгэврийн шинэчлэлийн талаар баримтлах бодлогын баримт бичиг дээр зөвшилцөл хийх байр суурьтай байна.

Засгийн газраас өргөн барьсан нийгмийн даатгалын багц хуульд тэтгэмж, үйлдвэрийн ослоос шалтгаалсан даатгалын асуудлууд байгаа ч бид энэ тухай ярихгүй. 

Бидний тавьж байгаа хоёр санал

Нэгдүгээрт нийгмийн даатгалын багц хуулийн төсөлд 2%-ийн хуримтлалыг даатгуулагчийн төлж байгаа шимтгэлээс авахаар оруулсан нь зөв. Ингэснээр тэтгэврийн хуримтлалын сан үүснэ. Гэхдээ үүн дээр нэмээд төсвөөс мөнгө оруулахаар тусгасан байна. Хуримтлал үүсгэж байгаа бол даатгуулагчийн шимтгэлээс аваад төсвөөс гарах гэж байгаа мөнгөөр зардлыг нь төлөхгүй бол Засгийн газрын 28 дахь тусгай сан болох маш том эрсдэлтэй.

Хоёрдугаарт тэтгэврийн зөрүүг арилгахын тулд ажилчдын дундаж цалингаар өсөлтөөр арилна. Инфляц дагаж тэтгэврийг нэмэх юм бол тэтгэврийн зөрүүг арилгах бус амьжиргааг нь дордуулахгүй байх хагас арга хэмжээ гэсэн зарчмын байр суурийг илэрхийлж байна" хэмээн ярилаа.