Сүүлийн саруудад махны үнэ тэнгэрт хадаж, иргэдийн өдөр тутмын амьжиргаанд хүнд цохилт болж байна. Хамгийн наад захын жишээ хэлэхэд, үхрийн махны үнэ килограмм нь 36 мянган төгрөгт хүрч, өнгөрсөн оны мөн үеэс даруй 53.2 хувиар өссөн статисткийн мэдээ гарсан. Энэ нь ард түмний худалдан авах чадвар туйлдаж, хоосон хонохдоо тулсныг бэлхнээ гэрчилнэ.

Гэвч үнийн энэ галзуурлын өмнө Засгийн газар нь нэгдмэл байр суурьгүй, салбарын сайд нар нь "толгой хуурамч" мэдэгдэл хийсээр сууна. Ерөнхий сайд Н.Учрал "Хүчит шонхор" зах дээр очиж, махны үнийн дарамтыг бууруулах шийдвэр гаргахаа мэдэгдэж нөөцийн махны үнийг зах зээлийн үнийн дүнд нийцүүлж худалдаалж эхэлсэн. Гэтэл Эдийн засаг, хөгжлийн сайд Ж.Энхбаяр "Төр махны үнийг зохиомлоор барихгүй, зах зээлийн хуулиараа яваг" гэсэн байр суурь илэрхийлж, зах зээлийн нийлүүлэлт, эрэлт болон хувийн хэвшлийн харилцаанд төр хэт оролцох нь зохимжгүй гэж онцолсон юм.

"Зах зээлийн чөлөөт өрсөлдөөн" ярьж суугаа Ж.Энхбаяр сайд өөрөө ЖДҮ-ээс зээл авч, "Герефорд" үржлийн үхрийн ферм байгуулсан нэгэн. Ард түмэн үнэтэй мах авч чадахгүй туйлдаж байхад, махны бизнес эрхлэгч сайд маань "Үнэ чөлөөтэй байх ёстой" гэж зүтгэж буй нь улаан цайм ашиг сонирхлын зөрчил биш гэж үү... Төрд ард түмний эрх ашиг уу, эсвэл сайдын фермийн ашиг орлого чухал уу гэдэг асуулт эндээс урган гарч байна.

Мөн түүний 2024 оны ХОМ-ийг харахад,

Өөрийн орлого - 2.5 тэрбум төгрөг

Гэр бүлийн орлого - 36 сая төгрөг

Үл хөдлөх хөрөнгө  8 тэрбум

Автомашин - 250 саяар үнэлэгдэх туулах чадвар өндөр Mercedes Benz, G 500 зэрэг автомашинтай

Үнэт эдлэл - 200 саяар үнэлэгдэх үнэт эдлэлтэй бөгөөд эзэмших зориулалттай хоёр газартай
Дотоодын хадгаламж - Түүний авлага нь 11.4 тэрбум төгрөг бол дотоодын банк, санхүүгийн байгууллагад байрлах хадгаламж нь 1.5 тэрбум төгрөг

Хуулийн этгээд - “Газар" ХХК-д 151 мянган хувьцаа, Капитал Партнерс ББСБ ХХК-д 17000 ширхэг хувьцаа эзэмшдэг байна.