Нийслэлийн МАН -ын хороо өнөөдөр /2026.05.19/ хуралдаж хотын даргад нэр дэвшигчийг албан ёсоор тодруулах юм.

Одоогоор шинэ хотын даргад НИТХ дэх МАН-ын бүлгийн дарга Ж.Сандагсүрэн, НИТХ -ын төлөөлөгч Б.Сэмжидмаа, одоогоор хотын даргын үүргийг түр орлон гүйцэтгэж буй нийслэлийн I орлогч Б.Мөнхбат нарын нэр яригдаж байна. Тэднийн нэг томилогдвол Х.Нямбаатар талаас дараагийн хотын дарга тодорно гэсэн үг. Нөгөө талд хотын даргын томилгоонд хамгийн их “санаа тавьж” буй хүн бол Ерөнхий сайд Н.Учрал. Түүний зүгээс дээрх тохироотой холбогдуулан Б.Пүрэвдагвыг зүтгүүлэх хувилбар гаргасан. 

Тэгвэл өчигдөр орой Б.Пүрэвдагва нь баталгаажиж байгаа гэсэн мэдээлэл түгсэн юм. Та бүхэнд Нийслэлийн Засаг дарга бөгөөд Улаанбаатар хотын захирагчийн албан тушаалд очих өндөр магадлалтай буй Б.Пүрэвдагвыг танилцуулж байна.

Бяруузанын Пүрэвдагва нь Монгол Улсын их сургуулийг улс төр судлаач мэргэжлээр төгсссөн. 2017 онд Австрали улсын Нью-Кэслийн их сургуульд Тогтвортой хөгжлийн чиглэлээр магистрын зэрэг хамгаалжээ.

2009-2011 онд нийслэлийн Баянгол дүүргийн Нийгмийн Ардчилал Монголын Оюутны Холбоо /НАМОХ/-ны дарга

2009-2011 онд Монгол Ардын Намын Удирдах Зөвлөлийн Ажлын албаны Намын байгуулалтын газрын Улс төрийн ажилтан 2011-2012 онд Монгол Ардын Намын Ерөнхий нарийн бичгийн даргын шадар туслах

2013-2015 онд Нийгмийн Ардчилал Монголын Оюутны Холбооны Удирдах зөвлөлийн гишүүн

2016-2017 Монгол Ардын Намын Ерөнхий нарийн бичгийн даргын орон тооны зөвлөх зэрэг албан тушаалыг хашиж, 2017 оноос Монгол Ардын Намын Удирдах Зөвлөлийн Ажлын албаны Орон нутаг, намын хөгжлийн хэлтсийн даргаар ажилласан. Одоо МАН- ын залуучуудын байгууллага болох СДМЗХ- ны ерөнхийлөгчөөр ажилладаг юм байна.