Нэгдсэн Үндэстний Байгууллагын Хүний эрхийн дээд комиссар, эрхэмсэг ноён Волкер Түрк тэргүүтэй албаны төлөөлөгчид Монгол Улсад хийж буй айлчлалынхаа хүрээнд МБШТ- Гандантэгчэнлин хийдэд зочлон, тус хийдийн Тэргүүн их хамба, 30 дахь хамба номун хан, гэвш лхаарамба Д.Жавзандорж болон Гадаад харилцаа хариуцсан тэргүүлэгч, доктор, профессор М.Ганхуяг болон албаны бусад хүмүүсийн хамтаар уулзалт хийлээ. Уулзалтын үеэр талууд хүн төрөлхтний нийтлэг үнэт зүйл болох харилцан хүндлэл, хүний эрхийг дээдлэх, бусдыг хайрлан энэрэх сэтгэл, эв нэгдэл болон энх амгаланг бэхжүүлэхэд Бурханы сургаалын ач холбогдлын талаар онцлон тэмдэглэв.