2026 оны 5 дугаар сарын 8-ны өдөр Монгол Улсын Их Хурлын хаврын чуулганы нэгдсэн хуралдаанаар “Эрхтэн, эд, эс шилжүүлэн суулгах тухай хууль”-ийн төслийг хэлэлцэн баталлаа.

Хууль батлагдсанаар:

• Донор болон реципиентийн эрх, аюулгүй байдал олон улсын жишигт нийцэн хамгаалагдана
• Иргэд эрхтэн, эд, эс шилжүүлэн суулгах эмчилгээг эх орондоо хийлгэх боломж нэмэгдэнэ
• Эсийн эмчилгээ, хүйн цус, эд, эсийн банк байгуулах эрх зүйн орчин бүрдэнэ
• Амьд болон амьгүй донорын зохицуулалт илүү тодорхой болно
•  OPT IN / OPT OUT холимог тогтолцоо нэвтэрнэ
•  Амьгүй донорын ар гэрт оршуулгын тэтгэмж олгох боломж бүрдэнэ
•  Эрхтэн, хүний наймаанаас сэргийлэх хяналт, хамгаалалт сайжирна.

 Энэхүү хууль нь олон хүний амь насыг аврах, эмчилгээний хүртээмжийг нэмэгдүүлэх, эрхтэн, эд, эс шилжүүлэн суулгах эмчилгээний тогтолцоог олон улсын жишигт хүргэх чухал шинэчлэл боллоо. Хуулийн төслийн анхны танилцуулга, хэлэлцүүлгийг 2022 оны 7 дугаар сарын 21-ний өдөр зохион байгуулсан бөгөөд УИХ-ын гишүүн Ж.Чинбүрэн, Н.Учрал болон эрхтэн, эд, эс шилжүүлэн суулгах үйл ажиллагаанд оролцож буй эмч, эмнэлгийн мэргэжилтэн, эрүүл мэндийн байгууллагын удирдлага, иргэд, олон нийтийн төлөөлөл оролцсон.

Монгол Улсад анх удаа 126 гишүүнтэй шинэ парламент байгуулагдсанаар 2025 онд УИХ-ын гишүүн Ж.Чинбүрэн, Ж.Алдаржавхлан, А.Ариунзаяа, Н.Батсүмбэрэл нар хуулийн төслийг дахин УИХ-д өргөн барьсан юм.  Хуулийн төслийг Байнгын хороо болон чуулганы нэгдсэн хуралдааны хэлэлцүүлэгт бэлтгэх, санал, дүгнэлт боловсруулах ажлын хэсгийг УИХ-ын гишүүн Б.Баярбаатар ахлан ажиллаж, Хүний хөгжил, нийгмийн бодлогын байнгын хорооны хуралдаанаар 5 удаа, УИХ-ын нэгдсэн хуралдаанаар 3 удаа хэлэлцэн 2026 оны 5 дугаар сарын 8-ны өдөр Монгол Улсын Их Хурлын хаврын чуулганы нэгдсэн хуралдаанаар “Эрхтэн, эд, эс шилжүүлэн суулгах тухай хууль”-ийн төслийг хэлэлцэн ийнхүү эцэслэн баталлаа.