Хан-Уул дүүргийн засаг дарга Б.Цэрэн ажилдаа тэнцэхгүй байгааг олон нийт шүүмжилсээр байгаа билээ. Удаа дараа ажил албандаа тэнцэхээргүй гэдгээ баталсан тул  ХУД-ийн ИТХ дахь АН-ын бүлгээс түүнийг огцруулах нь зүйтэй гэж үзсэн бөгөөд түүнийг огцруулах дараах таван шалтгааныг нэрлэжээ. Үүнд:

1. Нийтийн эрх ашиг, хууль дээдлэх зарчим алдагдсан;
2. Төрийн үйл ажиллагааны ил тод байдал, хариуцлагын тогтолцоо хангалтгүй;
3. Төрийн албаны ёс зүй, улс төрийн төвийг сахих зарчим зөрчигдсөн;
4. Иргэдийн Төлөөлөгчдийн Хурлын үйл ажиллагааг үл хүндэтгэсэн, тайлагнах үүргээ хэрэгжүүлээгүй;
5. Газар зохион байгуулалтын үйл ажиллагаанд хууль тогтоомжийн хэрэгжилт хангагдаагүй;

Эдгээр нөхцөл байдал нь иргэдийн мэдэх эрхийг хязгаарлаж, төрд итгэх итгэлийг сулруулж, хууль дээдлэх зарчмыг алдагдуулах бодит эрсдэл үүсгэж байна.

Монгол Улсын “Засаг захиргаа, нутаг дэвсгэрийн нэгж, түүний удирдлагын тухай хууль”, “Төрийн албаны тухай хууль” болон холбогдох бусад хууль тогтоомжид заасан төрийн албаны ёс зүй, ил тод байдал, хариуцлагын үндсэн зарчмыг зөрчсөн гэж үзэх бүрэн үндэслэл болж байна гэж  ХУД-ийн ИТХ-ын АН-ын бүлэг үзсэн.

Өөрөөр хэлбэл Б.Цэрэн нь төвийг сахих ёстой атал иргэдийнхээ эсрэг Х.Нямбаатарын хууль бус жагсаалд оролцсон, ИТХ-д тайлангаа тавьдаггүй, гадаад томилолтод хэдэн төгрөг зарцуулсан зэргээ “нууцалдаг”, хуулиар хүлээсэн үүргээ биелүүлдэггүй зэрэг алдаа дутагдал гаргасаар байгаа аж.

Уг санаачилга ажил хэрэг болоод явж байгаа бөгөөд ХУД-ийн ИТХ-ын төлөөлөгчдөөс гарын үсэг зурах нь ч цөөнгүй байгаа бизээ. Тэдний хувьд муу муухай зүйлээ сүлбэлдүүлэн хольдог болохоор буруу зүйл хийсэн ч дуугүй өнгөрье гэх бодол нь дийлээд байгаа гэх таагүй сураг бий. Гэхдээ шаардлага тавих ёстой хүмүүсийн тул гарын үсэг зурах нь цаг хугацааны асуудал болсон гэнэ шүү.

улс төр