Өргөдлийн байнгын хороо өнөөдөр /2026.04.01/ хуралдаж, УИХ-ын 2026 оны хаврын ээлжит чуулганы хугацаанд хийх төлөвлөгөөт хяналт шалгалтын цаглаварт тусгагдсан “Хүүхдийн хоол, хүнсний бүтээгдэхүүний аюулгүй байдлыг хэрхэн хангаж байгаа талаар мэдээлэл сонсох арга хэмжээний хүрээнд Ерөнхий боловсролын сургуулийн хоол үйлдвэрлэл, үйлчилгээний тухай хуулийн хэрэгжилтийн талаар мэдээлэл сонслоо.

 Улсын хэмжээнд 2025-2026 оны хичээлийн жилд 717 ерөнхий боловсролын сургуульд 739382 сурагч, 1046 цэцэрлэгт 231241 хүүхэд, 527 дотуур байранд 34077 хүүхэд нийт 2299 байгууллагт 1078756 суралцагч суралцаж байна. Ерөнхий боловсролын сургуулийн 47.2 хувь буюу 349430 бага ангийн суралцагч “Үдийн хоол хөтөлбөр”-т хамрагдаж байна.  “Үдийн хоол хөтөлбөр”-т 2026 оны Улсын төсөвт 323.9 тэрбум төгрөг батласан. Ерөнхий боловсролын сургуулийн хоол үйлдвэрлэлд 2025 оны байдлаар 1775 үндэсний үйлдвэрлэгч хүнсний түүхий эд, бүтээгдэхүүн нийлүүлж байна.  Хүн амын хоол тэжээлийн судалгаагаар ерөнхий боловсролын сургуулийн сурагчдын дунд 19.6 хувь нь илүүдэл жинтэй, 6.2 хувь нь таргалалттай, өсөлт хангалтгүй, хоол тэжээлийн дутагдалтай зэрэг нь бусад хувийг эзэлжээ. Үдийн хоолны дундаж илчлэг 394.7 ккал, уураг 17.5 гр, өөх тос 12 гр, нүүрс 54.1 гр байгаа нь хүүхдийн хоногийн шим тэжээлийг хангаж чадахгүй, хоолны цэс нэг төрөлд хэт төвлөрсөн байгаа нь хүүхдийн өсөлт хөгжил, дархлаанд сөргөөр нөлөөлдгийг мэргэжилтнүүд хэлж байна. Гишүүд цэцэрлэгийн хүүхдийн хоолны шим тэжээлийг сайжруулах, зардлыг нэмэгдүүлэх, дунд ахлах ангийн хүүхдүүдийг “Үдийн хоол хөтөлбөр”-т хамруулах, бүс нутгийн байршлаас хамааран хоол тэжээл, төсвийн ялгавартай байдлыг арилгах, хоол зүйчдийг бэлтгэх, гал тогооны тоног төхөөрөмжийг сайжруулах зэрэг асуудалд хариулт авлаа.