Хөгжлийн банкны хэрэгт холбогдох УИХ-ын гишүүн Н.Алтанхуяг тэргүүтэй 42 хүн, гурван хуулийн этгээдийн хэргийг өнөөдөр Нийслэлийн Эрүүгийн хэргийн давж заалдах шатны шүүх хэлэлцэж, анхан шатны шүүхийн цагаатгах шийдвэрийг хүчингүй болголоо.

Анхан шатны шүүхээс өмнө нь яллагдагчдыг цагаатгасан шийдвэр гаргасан байсан ч давж заалдах шатны шүүх уг шийдвэрийг ийнхүү хүчингүйд тооцсон байна. Ингэснээр процессийн хувьд хэргийг дахин анхан шатны шүүхээр хэлэлцүүлэх нөхцөл бүрдэж байна.

Уг хэрэг анх 2022 онд Нийслэлийн прокурорын газраас нийт 80 хүн, дөрвөн хуулийн этгээдэд холбогдуулан яллах дүгнэлт үйлдэж, Сүхбаатар дүүргийн Эрүүгийн хэргийн анхан шатны шүүхэд шилжүүлж байв. Түүнээс хойш уг хэргийг шүүхийн гурван шатанд удаа дараа хэлэлцэж ирсэн юм.

Өмнө нь Улсын дээд шүүх анхан болон давж заалдах шатны шүүхийн шийдвэрүүд хэргийн бодит байдалтай нийцээгүй гэж үзэн 26 хүнд холбогдох хэргийг хэрэгсэхгүй болгож, үлдсэн хэсгийг дахин хэлэлцүүлэхээр анхан шатны шүүхийн шийдвэрийг хүчингүй болгож байсан.

Мөн Н.Алтанхуягт холбогдох хэргийг өмнө нь шүүхээс гурван удаа цагаатгаж байсан ч өнөөдрийн давж заалдах шатны шүүхийн шийдвэрээр уг цагаатгах тогтоол хүчингүй болж, хэргийг дахин анхан шатны шүүхээр хэлэлцүүлэхээр боллоо.

Шүүхийн дэлгэрэнгүй тоймыг ЭНД дарж уншина уу.