НИТХ-ын ээлжит бус X хуралдаан өчигдөр болж, нийслэлийн төсвийн бодлого төлөвлөлт бодит байдлаас хэр тасарсныг дахин харууллаа.

Уг хуралдааны үеэр НИТХ-ын төлөөлөгч Б.Золтуяа “Нийслэл 4.3 их наядын төсвийг сар хагасын өмнө баталчихаад, одоо 6.5 их наяд болгож нэмэгдүүлэх гэж байна” хэмээн онцолсон юм. Оны төгсгөлд баталсан төсвөө ердөө сар гаруйн дараа 2.2 их наядаар нэмэгдүүлэх гэж буй нь нийслэлийн санхүүгийн бодлого ямар ч тооцоо, хариуцлагагүй явж ирснийг илтгэнэ. Ийм богино хугацаанд ийм хэмжээний зөрүү гарч байна гэдэг нь төсөв анхнаасаа бодит судалгаа, нарийвчилсан төлөвлөлтгүй батлагдсаны тод жишээ.

Хотын удирдлагууд “мега төсөл” хэмээн гоё нэр зүүсэн ажлуудаар төсвийн өсөлтийг зөвтгөхийг оролдож байгаа ч эдгээр төслийн бодит үр ашиг иргэдийн амьдралд хэзээ мэдрэгдэх нь тодорхойгүй, олон жилийн дараа үр дүн нь харагдах эсэх нь ч эргэлзээтэй хэвээр байна. Үүний тод жишээ нь “УБ трамвай” төсөл юм. Өнгөрсөн жил уг төслийн ТЭЗҮ-ийг боловсруулах үеэр төр, хувийн хэвшлийн түншлэлээр хэрэгжүүлж, 28 жилийн хугацаанд жил бүр 66 тэрбум төгрөгийг нийслэлээс гаргана гэж тайлбарлаж байсан. Гэтэл өнөөдөр 2026 оны төсөвт уг төсөлд шууд 350 тэрбум төгрөг суулгаж оруулж ирсэн нь өмнөх бүх яриа, тооцоолол үндсэндээ худлаа байсныг харуулж байна.

Иргэдийн татвараар бүрдсэн нийслэлийн төсвийг ингэж богино хугацаанд, ийм их хэмжээгээр “засварлаж” буй нь хотын удирдлагын хариуцлагагүй, бодлогогүй шийдвэрийн илрэл гэж үзэхээс өөр аргагүй. Яагаад 4.3 их наядын төсөв хангалттай, бодитой гэж үзэн баталчхаад сар хагасын дараа 6.5 их наяд болгох шаардлага гэнэт гарсан бэ гэдэг асуултад хотын дарга, удирдлагууд тодорхой, үндэслэлтэй хариулт өгөх ёстой. Үгүй бол нийслэлийн төсөв иргэдийн эрх ашигт бус, цөөн төслийн нэрийн дор дураараа “тэлдэг” санхүүгийн хэрэгсэл болж хувирч байна гэх хардлага улам гүнзгийрэх нь гарцаагүй.