Монголын Хуульчдын холбооны Ерөнхийлөгч М.Мөнхбат, Хот байгуулалт, барилга, орон сууцжуулалтын яамны төрийн нарийн бичгийн дарга М.Баяраа нар өнөөдөр /2026.02.24/ хамтын ажиллагааны санамж бичигт гарын үсэг зурж баталгаажууллаа. Санамж бичиг зурах ёслолын ажиллагааны үеэр Хот байгуулалт, барилга, орон сууцжуулалтын яамны төрийн нарийн бичгийн дарга М.Баяраа “Газар зохион байгуулалт уялдахгүй явснаар олон асуудал үүссэн. Тиймээс эрх зүйн орчныг сайжруулах, хууль, дүрэм, журмыг боловсронгуй болгоход мэргэжлийн холбооны дэмжлэг, туслалцаа зайлшгүй шаардлагатай байгаа учраас та бүхэнд хандсан” хэмээн онцолсон. Монголын Хуульчдын холбооны Ерөнхийлөгч М.Мөнхбатын зүгээс “Хуулийг цэгцтэй болгох, системчлэх, барилгын салбарын эрх зүйг хөгжүүлэх ажилд Монголын Хуульчдын холбоо оролцохдоо таатай байна” гэдгийг хэлсэн юм. Тус санамж бичгийн хүрээнд Хот байгуулалт, барилга, орон сууцжуулалтын хууль, эрх зүйн орчныг боловсронгуй болгох, хуулийн төсөл, дүрэм, журам боловсруулахад мэргэжлийн дэмжлэг, туслалцаа үзүүлэх, судалгаа, шинжилгээ хийх, хэлэлцүүлэг, зөвлөгөөн, сургалт зохион байгуулах чиглэлээр хамтран ажиллана.